17 Sep 2026
(لاہور نیوز) ڈی جی ستھرا پنجاب عمر جاوید نے کہا ہے کہ صوبے میں ڈور ٹو ڈور صفائی کے مؤثر میکنزم پر بھرپور توجہ دی جا رہی ہے، جبکہ اس چیلنج سے نمٹنے کے لیے افسران مسلسل کام کر رہے ہیں۔
اپنے بیان میں ڈی جی ستھرا پنجاب عمر جاوید نے بتایا کہ روزانہ تقریباً 4 ہزار شکایات موصول ہوتی ہیں، جن کا ازالہ 24 گھنٹوں کے اندر مکمل کرنے کی کوشش کی جاتی ہے، لاہور میں روزانہ تقریباً 7 سے 10 ہزار ٹن کوڑا ڈمپ کیا جاتا ہے، جبکہ پورے پنجاب میں روزانہ تقریباً 45 سے 50 ہزار ٹن کوڑا اکٹھا کیا جاتا ہے۔ ان کے مطابق صوبے کے ہر شہر میں ڈمپنگ سائٹس موجود ہیں۔
عمر جاوید نے بتایا کہ ملتان، روجھان اور چوبارہ تحصیل میں صفائی ورکرز کی تنخواہوں سے متعلق مسائل حل کروا دیے گئے ہیں۔ بعض تحصیلوں میں صفائی کے کنٹریکٹس منسوخ کرکے نئے کنٹریکٹس بھی کیے گئے ہیں، ورکرز کو تنخواہیں مقررہ وقت پر ادا کی جاتی ہیں، تاہم اگر کوئی قانونی مسئلہ درپیش ہو تو ادائیگی میں تاخیر ہوسکتی ہے۔
انہوں نے کہا کہ زیرو ویسٹ ایک مستقل عمل ہے، جو مکمل طور پر کبھی ختم نہیں ہوسکتا، تاہم روزانہ کی بنیاد پر صفائی کا کام جاری رہتا ہے۔ ہماری کوشش ہے کہ صفائی کا کام مؤثر انداز میں مکمل کیا جائے اور شہریوں کو بہتر صفائی کی سہولت فراہم کی جائے۔
آپ کی اس خبر کے متعلق رائے
