: آئی جی پنجاب نے ٹریفک وارڈنز کی جانب سے بیچ سڑک گاڑیاں روک کر چالان کرنے کے عمل کا سخت نوٹس لیتے ہوئے واضح ہدایات جاری کر دی ہیں۔
آئی جی پنجاب عبدالکریم کے مطابق بعض ٹریفک وارڈنز ناکے لگا کر ٹریفک کی روانی متاثر کرتے ہوئے چالاننگ پر زیادہ توجہ دے رہے ہیں، جس سے شہریوں کو مشکلات کا سامنا کرنا پڑتا ہے۔
انہوں نے ہدایت کی ہے کہ ٹریفک وارڈنز کو بیچ سڑک گاڑیاں روک کر چالان کرنے سے مکمل طور پر روکا جائے اور اس پریکٹس کو فوری ختم کیا جائے۔
آئی جی پنجاب نے سی ٹی اوز کو ہدایات جاری کرتے ہوئے کہا ہے کہ سرکل افسران اور سیکٹر انچارجز اپنے عملے کو بریف کریں اور ٹریفک کی روانی کو ہر صورت یقینی بنایا جائے۔
انہوں نے واضح کیا کہ آئندہ اس نوعیت کی کسی بھی پریکٹس کو برداشت نہیں کیا جائے گا اور وارڈنز کو چالاننگ کے ساتھ ساتھ شہریوں کی سہولت اور ٹریفک کے بہاؤ کو ترجیح دینا ہوگی۔
