وزیر اعلیٰ پنجاب مریم نواز  نے کہا ہے کہ کشمیر کی عوام نے اپنی کامیابی اور ترقی پر مہر لگائی ہے، پہلے مرحلے میں کامیابی پر کارکنوں کو مبارکباد دیتی ہوں، قائد نوازشریف، وزیراعظم شہبازشریف کو کامیابی پرمبارکباد دیتی ہوں، کشمیر کے عوام نے نوازشریف اور ن لیگ پر اعتماد کا اظہار کیا ہے۔

عوام اب باشعور ہوچکے ہیں۔سیاسی بیان بیازی اور رونے دھونے سے عوام کو دھوکا نہیں دیا جا سکتا، آزادکشمیر میں ایک ہی آواز سنی کہ ہمیں پنجاب والی سہولتیں چاہیں، آپ کے پاس سندھ کا کوئی بھی منصوبہ بتانے کیلئے نہیں تھا، سندھ واحد صوبہ جہاں 17 سال سے پیپلزپارٹی کی حکومت ہے۔

انہوں نے کہا کہ آپ کا کوئی ایجنڈا تھا نہ ہی بیانیہ۔گلگت بلتستان میں آپ کےجلسوں میں عوام نے شرکت نہیں کی، گلگت بلتستان کا الیکشن آپ جیت گئے وہاں دھاندلی نہیں ہوئی، الیکشن کافیصلہ ریاست نہیں کرتی بلکہ عوام کرتی ہے، پیپلزپارٹی کو چاہیے تھا فراخدلی سے اپنی شکست تسلیم کرتی ۔

مریم نواز نے کہا آپ کے پاس عوام کیلئے کچھ نہیں ہے اب دھاندلی کا رونا دھونا کررہے ہیں۔آزادکشمیر کے عوام نے پنجاب کی ترقی کو دیکھ کرووٹ دیا ہے، سندھ میں 17 سال کی حکومت کے باوجود آپ کےپاس بتانے کیلئے کچھ نہیں ہے،عوام کے ووٹ، عوام کے فیصلے کوکھلے دل سے قبول کریں۔

وزیر اعلیٰ نے کہا کہ آپ کی بھی جمہوریت کیلئے بہت قربانیاں ہیں ۔اگر آپ تھوڑی سےمحنت کرلیں تو نتائج بہتر ہوسکتے ہیں ۔جن کی اپنے صوبے کی سڑکیں ٹوٹی ہوئی ہیں وہ آزادکشمیر کی سڑکیں کیسے بنائیں گے۔

سیاسی بیان بازی، رونے دھونے سے بات نہیں بنتی ، آج عوام باشعور ہیں، بلاول کو سمجھانا چاہتی ہوں کہ الیکشن کا فیصلہ ریاست نہیں عوام کرتے ہیں، بلاول صاحب آپکے پاس عوام کو بتانے کے لیے پرفارمنس اور نہ کوئی ریکارڈ تھا۔پرفارمنس ہوتی تو آپ کو ہمارے اوپر تنقید کرنے کا وقت نہ ملتا بلاول شاید بھول گئے ایک سال سے آزاد کشمیر میں آپکی حکومت تھی۔

انہوں نے کہا کہ  پیپلزپارٹی کے دور میں آزاد کشمیر کے حالات خراب ہوئے، سندھ کی سڑکیں بہتر کریں، گورننس بہتر کریں، میں  نے کہا تھا ہم آزادکشمیر کو پنجاب جیسی ترقی دیں گے، آپ الیکشن مہم میں یہ بھی نہیں کہہ سکے کہ ہم آزادکشمیر کوکراچی جیسا بنائیں گے، آزادکشمیر میں آپ کی حکومت ہے ،دھاندلی کاالزام کس پرلگا رہے ہیں،عوام رونے دھونے والوں کوووٹ نہیں دیا کرتے۔

مریم نواز  کا کہنا تھا کہ ذاتیات پربات کرنے اور تنقید کرنےکےسوا آپ کے پاس کچھ بھی نہیں، آزادکشمیر میں وہ تمام کام ہوں گے جو پنجاب میں کیے جارہے ہیں جبکہ پیپلزپارٹی کی دھاندلی کی ویڈیوز سامنے آئی ہیں جو وائرل ہو چکی ہیں۔