(لاہور نیوز) قلعہ ستار شاہ کے قریب شدید بارشوں کے باعث نالے میں طغیانی آنے سے ریلوے پل کو شدید نقصان پہنچا ہے، جس کے باعث لاہور اور فیصل آباد کے درمیان ٹرین سروس عارضی طور پر معطل کر دی گئی۔

ریلوے حکام کے مطابق نالے میں آنے والے شدید ریلے سے پل کا انفراسٹرکچر بہہ گیا، جس کے بعد ٹرینوں کی آمد و رفت کو حفاظتی اقدامات کے تحت روک دیا گیا۔

ڈویژنل ٹرانسپورٹ آفیسر ریلوے لاہور ڈویژن کے مطابق قراقرم ایکسپریس اور شالیمار ایکسپریس کو لاہور سے فیصل آباد کے بجائے براستہ رائیونڈ، ساہیوال اور خانیوال چلایا جائے گا، لاہور سے کراچی جانے والی قراقرم ایکسپریس (42-ڈاؤن) اپنے مقررہ وقت سہ پہر 3 بجے براستہ ساہیوال روانہ ہو گی، جبکہ فیصل آباد کے مسافروں کو ملت ایکسپریس میں ایڈجسٹ کیا جائے گا۔

اسی طرح کراچی سے لاہور آنے والی شالیمار ایکسپریس بھی آج براستہ ساہیوال لاہور پہنچے گی، جبکہ لاہور اور سرگودھا کے درمیان چلنے والی میانوالی ایکسپریس کو براستہ وزیرآباد اور لالہ موسیٰ چلایا جائے گا۔

ریلوے حکام  نے بتایا کہ لاہور اور فیصل آباد کے درمیان چلنے والی بدر ایکسپریس اور غوری ایکسپریس کو منسوخ کر دیا گیا ہے، ان ٹرینوں کے مسافر اپنے قریبی ریزرویشن آفس یا لاہور ریزرویشن آفس سے ٹکٹ کی مکمل رقم واپس حاصل کر سکتے ہیں۔

ادھر کراچی ایکسپریس بھی اپنے مقررہ وقت شام 6 بجے کے بجائے 45 منٹ تاخیر سے شام 6 بجکر 45 منٹ پر لاہور سے روانہ ہو گی۔

ریلوے حکام کا کہنا ہے کہ حالیہ شدید بارشوں کے باعث لاہور اور فیصل آباد سے کراچی، کوئٹہ، راولپنڈی اور دیگر شہروں کیلئے چلنے والی متعدد ٹرینوں کا شیڈول متاثر ہوا ہے، جبکہ متاثرہ ریلوے پل کی بحالی کیلئے کام جاری ہے۔

Follow Lahore News on X

Install our App