(ویب ڈیسک) ماہرین کی جانب سے سگریٹ نوشی کی عادت سے جان چھڑانے میں مددگار آسان طریقہ کار بتا دیا گیا۔

ماہرین کی  تحقیق میں دریافت کیا گیا کہ اگر آپ سگریٹ نوشی کی عادت سے جان چھڑانا چاہتے ہیں تو یوگا کو روزمرہ کے معمولات کا حصہ بنالیں۔

تحقیق میں دریافت کیا گیا کہ یوگا کو معمول بنانے سے تمباکو نوشی کے عادی افراد کے لیے اس لت سے جان چھڑانا آسان ہو جاتا ہے جبکہ انزائٹی، ڈپریشن اور ان علامات کی شدت گھٹ جاتی ہے، جن کا سامنا سگریٹ سے دور رہنے پر ہوتا ہے۔

اس تحقیق میں ماضی میں ہونے والے تحقیقی کام کا تجزیہ کیا گیا تھا۔

تحقیق کے مطابق یوگا کی مشقیں کرنے سے سگریٹ نوشی سے نجات پانے کا امکان 50 فیصد تک بڑھ جاتا ہے۔محققین نے بتایا کہ نتائج سے عندیہ ملتا ہے کہ یوگا ایسی جسمانی سرگرمی ہے جو تمباکو نوشی سے نجات دلانے میں نمایاں حد تک مدد فراہم کرتی ہے۔

اس تحقیق میں مختلف ممالک سے تعلق رکھنے والے 629 افراد پر ہونے والے 7 کلینیکل ٹرائلز کے شواہد کا تجزیہ کیا گیا تھا جبکہ 5 دیگر تحقیقی رپورٹس کے نتائج کی بھی جانچ پڑتال کی گئی۔

عالمی ادارہ صحت کے مطابق تمباکو نوشی سے متعدد امراض بشمول کینسر، امراض قلب اور دیگر کا خطرہ بڑھتا ہے۔

تمباکو نوشی سے لاحق ہونے والے دائمی امراض کے نتیجے میں ہر سال دنیا بھر میں 87 لاکھ اموات ہوتی ہیں اور بیشتر افراد اس لت سے نجات پانے کی کوشش کرتے ہیں، مگر ناکامی کا سامنا ہوتا ہے۔

اس تحقیق میں دیکھا گیا تھا کہ یوگا کی مختلف اقسام سے تمباکو نوشی سے نجات پانے میں کس حد تک مدد ملتی ہے۔

نتائج سے معلوم ہوا کہ یوگا سے نہ صرف اس لت سے نجات پانے میں مدد ملتی ہے بلکہ ان علامات کی شدت بھی گھٹ جاتی ہے جن کا سامنا سگریٹ چھوڑنے کے باعث ہوتا ہے۔

اس سے قبل دسمبر 2023 میں آسٹریا کی Innsbruck یونیورسٹی کی تحقیق میں بتایا گیا کہ تیز رفتاری سے چہل قدمی سے سگریٹ پینے کی خواہش میں عارضی طور پر کمی لانے میں مدد ملتی ہے۔

اس تحقیق میں بتایا گیا کہ اگر کوئی فرد تمباکو نوشی کی عادت چھوڑنا چاہتا ہے تو گھر کے باہر یا اندر 10 منٹ کی معتدل ورزش سے سگریٹ کی خواہش کو دبانے میں مدد مل سکتی ہے۔

درحقیقت اس طرح تمباکو نوشی چھوڑنے کے بعد جن علامات کا سامنا ہوتا ہے، ان سے بچنے میں بھی مدد ملتی ہے۔اس تحقیق میں 16 ایسے افراد کو شامل کیا گیا تھا جو تمباکو نوشی کے عادی تھے۔

تمام افراد کو رات بھر سگریٹ نوشی سے دور رکھا گیا اور پھر انہیں 10 منٹ تک تیز رفتاری سے چہل قدمی کا کہا گیا یا چار دیواری کے اندر ورزش کرنے یا ساکت بیٹھے رہنے کی ہدایت کی گئی۔

ورزش سے قبل اور بعد میں سگریٹ پینے کی خواہش اور دیگر تفصیلات بھی حاصل کی گئیں۔

نتائج سے معلوم ہوا کہ 10 منٹ کی جسمانی سرگرمیوں سے سگریٹ پینے کی خواہش میں نمایاں کمی آئی جبکہ اس لت سے چھٹکارے پر جن علامات کا سامنا ہوتا ہے، ان کی شدت بھی گھٹ گئی۔

تحقیق کے مطابق ابھی اس حوالے سے مزید تجربات کرنے کی ضرورت ہے مگر نتائج سے عندیہ ملتا ہے کہ گھر سے باہر چہل قدمی کرنے پر 26 منٹ جبکہ چار دیواری کے اندر ورزش کے بعد 17 منٹ تک سگریٹ پینے کی خواہش میں کمی آتی ہے۔

Follow Lahore News on Facebook

Install our App