سانحہ کاہنہ: زخمی خاتون ٹیچر جنرل ہسپتال میں زیرعلاج، پولیس نے سکیورٹی سنبھال لی
(ویب ڈیسک) کاہنہ میں پیش آنے والے افسوسناک حادثے میں زخمی ہونے والی خاتون ٹیچر انیلا ریحان لاہور کے جنرل ہسپتال میں زیر علاج ہیں، جہاں ان کی حالت پہلے سے بہتر بتائی جا رہی ہے۔
میڈیکل رپورٹ کے مطابق ڈاکٹر اویس اور ڈاکٹر ثنا نے سرجیکل یونٹ ون میں خاتون کا طبی معائنہ کیا، ان کے سر کے دائیں حصے اور پیشانی پر معمولی زخم آئے، جبکہ بازو اور گھٹنے پر خراشیں بھی موجود ہیں، سر کے زخم پر سرجیکل ٹیم نے ٹانکے لگا دیئے ہیں۔
خاتون کے جسمانی اور دماغی سی ٹی سکین کے علاوہ بائیں گھٹنے کا ایکسرے بھی کیا گیا، جن کی رپورٹس کلیئر آئیں، کولہے میں درد کی شکایت پر آرتھوپیڈک یونٹ سے مشاورت کی گئی، جس کی ہدایت پر پیلوِس کا ایکسرے بھی کرایا گیا جو نارمل آیا، بعد ازاں مریضہ کو درد کے علاج کیلئے سرجیکل یونٹ ون میں منتقل کر دیا گیا۔
ذرائع کے مطابق پولیس اہلکار خاتون کی سکیورٹی کیلئے جنرل ہسپتال میں موجود ہیں، جبکہ ہسپتال سے ڈسچارج ہونے کے بعد انہیں حراست میں لئے جانے کا امکان بھی ظاہر کیا جا رہا ہے۔
