(لاہور نیوز) سکول ایجوکیشن ڈیپارٹمنٹ پنجاب نے صوبے بھر میں انتظامی عہدوں پر تعیناتی کیلئے سکریننگ ٹیسٹ لینے کا اعلان کیا ہے، جو بھرتیوں کے عمل کا چوتھا مرحلہ قرار دیا جا رہا ہے۔
محکمے کے مطابق چیف ایگزیکٹو آفیسرز (سی ای او)، ڈسٹرکٹ ایجوکیشن آفیسرز (ضلعی تعلیمی افسران) اور ڈپٹی ڈسٹرکٹ ایجوکیشن آفیسرز (ڈپٹی ضلعی تعلیمی افسران) کی اسامیوں کیلئے گریڈ 18 اور 19 کے افسران سے درخواستیں طلب کی گئی ہیں، جنہیں 30 اپریل تک جمع کروایا جا سکتا ہے۔
اعلان کے مطابق چیف ایگزیکٹو افسران اور ضلعی تعلیمی افسران کے عہدوں کیلئے عمر کی حد 55 سال جبکہ ڈپٹی ضلعی تعلیمی افسران کیلئے 50 سال مقرر کی گئی ہے۔ امیدواروں کا اسکریننگ ٹیسٹ پنجاب ایگزامینیشن کمیشن (PEC) کے زیر اہتمام لاہور میں منعقد ہوگا۔
محکمہ تعلیم کا کہنا ہے کہ ٹیسٹ میں کامیاب ہونے والے افسران کو انٹرویو کے مرحلے سے بھی گزرنا ہوگا، جس کے بعد میرٹ پر منتخب امیدواروں کو متعلقہ انتظامی عہدوں پر تعینات کیا جائے گا۔
