رشوت طلبی اور شہری کو ہراساں کرنے کے الزام میں دو پولیس اہلکار گرفتار، حوالات بند
(لاہور نیوز) شہری سے ایک لاکھ روپے رشوت طلب کرنے اور اسے ہراساں کرنے کے الزام میں دو پولیس اہلکاروں کو گرفتار کر کے حوالات بند کر دیا گیا ہے۔
پولیس کے مطابق ملزمان نے شہری کے پاس موجود کھلونا پستول کے سامان کو مبینہ طور پر آتش بازی کا مواد قرار دیا اور شہری کو ہراساں کرتے ہوئے ایک لاکھ روپے رشوت کا مطالبہ کیا۔
گرفتار کیے گئے اہلکاروں کی شناخت خرم شہزاد، جو پنجاب کانسٹیبلری سے تعلق رکھتا ہے، اور راشد وسیم کے نام سے ہوئی ہے، جو چوکی راجہ مارکیٹ میں تعینات تھا۔
دونوں اہلکاروں کے خلاف تھانہ راوی روڈ میں مقدمہ درج کر لیا گیا ہے جبکہ مزید تفتیش جاری ہے۔
اس حوالے سے ڈی آئی جی آپریشنز نے کہا ہے کہ شہریوں کو اختیارات کے ناجائز استعمال اور دباؤ کا نشانہ نہیں بننے دیں گے۔ انہوں نے دو ٹوک مؤقف اپنایا کہ اختیارات کا ناجائز استعمال کرنے والوں کے خلاف سخت کارروائی ہوگی۔
