(ویب ڈیسک) 50 سال سے کم عمر افراد میں کینسر کے بڑھتے ہوئے کیسز نے ماہرین کی توجہ حاصل کر لی ہے۔

نئی تحقیق میں جسم کی حیاتیاتی عمر تیزی سے بڑھنے کو کم عمری میں کینسر کے خطرے سے جڑا ممکنہ عنصر قرار دیا گیا ہے، واشنگٹن یونیورسٹی سکول آف میڈیسن میں ہونے والی تحقیق کے نتائج طبی جریدے نیچر میڈیسن میں شائع ہوئے ہیں، محققین  نے نوجوان افراد میں کینسر کے بڑھتے کیسز اور جسمانی عمر بڑھنے کے عمل کے درمیان ممکنہ تعلق کا جائزہ لیا۔

ماہرین کے مطابق انسان کی عمر صرف تاریخ پیدائش سے متعین نہیں ہوتی، تاریخ پیدائش کے حساب سے عمر کو زمانی عمر کہا جاتا ہے، جبکہ خلیات، اعضا، میٹابولزم اور جسم کے دیگر نظاموں کی مجموعی حالت سے ظاہر ہونے والی عمر حیاتیاتی عمر کہلاتی ہے، تحقیق میں ایک لاکھ 54 ہزار سے زائد افراد کے اعداد و شمار کا جائزہ لیا گیا، جبکہ نتائج کا موازنہ تقریباً 10 ہزار افراد پر مشتمل ایک دوسرے گروپ سے کیا گیا۔

نتائج کے مطابق 1990 سے 1999 کے دوران پیدا ہونے والے افراد میں حیاتیاتی عمر بڑھنے کی شرح 1965 سے 1969 کے دوران پیدا ہونے والے افراد کے مقابلے میں 92 فیصد زیادہ پائی گئی۔

محققین کے مطابق حیاتیاتی عمر میں تیزی سے اضافے کے ساتھ کم عمری میں کینسر کا خطرہ تقریباً 8 فیصد تک بڑھ سکتا ہے، یہ تعلق پھیپھڑوں اور نظامِ ہاضمہ سے متعلق بعض اقسام کے کینسر میں زیادہ نمایاں دیکھا گیا۔

تحقیق میں بتایا گیا کہ جینیاتی عوامل کے علاوہ طرزِ زندگی، جسمانی وزن، غذائی عادات اور ماحولیاتی عوامل بھی حیاتیاتی عمر پر اثرانداز ہو سکتے ہیں، زیادہ جسمانی وزن، الکحل کا استعمال، طویل عرصے تک بیٹھے رہنا اور غیر صحت بخش غذا مختلف بیماریوں اور بعض اقسام کے کینسر کے خطرے میں اضافے سے منسلک ہو سکتے ہیں۔

تاہم محققین  نے واضح کیا کہ حیاتیاتی عمر میں تیزی سے اضافے اور نوجوانوں میں کینسر کے خطرے کے درمیان تعلق کو بہتر طور پر سمجھنے کیلئے مزید تحقیق کی ضرورت ہے، موجودہ نتائج کسی ایک عامل کو کم عمری میں کینسر کی حتمی وجہ قرار نہیں دیتے۔

Follow Lahore News on X

Install our App