اعلامیہ کے مطابق آئی ٹی انفراسٹرکچر کی بہتری اور تکنیکی استعداد کار بڑھانے کے لیے بھی باہمی تعاون کیا جائے گا، رجسٹرار سپریم کورٹ سہیل محمد لغاری اور ڈی جی این آئی ٹی بی فقیر اللہ نے مفاہمتی یادداشت پر دستخط کیے۔

چیف جسٹس پاکستان یحییٰ آفریدی اور جسٹس میاں گل حسن اورنگزیب نے دستخط کی تقریب میں شرکت کی۔

چیف جسٹس یحییٰ آفریدی نے کہا کہ عدالتی نظام میں ٹیکنالوجی کا مؤثر استعمال عدالتی کارروائی کو زیادہ قابل رسائی اور مؤثر بنانے کے لیے ناگزیر ہے، ٹیکنالوجی کے ذریعے سائلین اور وکلا کے لیے انصاف تک رسائی اور عدالتی خدمات کی فراہمی بہتر بنائی جانی چاہیے۔

انہوں نے کہا کہ وکلا اور سائلین کو عدالتی اداروں کے ساتھ زیادہ آسان اور سہل انداز میں رابطے کی سہولت ملنی چاہیے، عدالتی ڈیٹا، ڈیجیٹل پلیٹ فارمز اور ادارہ جاتی نظام کے تحفظ کے لیے سائبر سیکیورٹی انتہائی اہم ہے۔

چیف جسٹس پاکستان کا کہنا تھا کہ عدلیہ کی ڈیجیٹل تبدیلی کو محفوظ، مستحکم اور پائیدار بنانے کے لیے مضبوط سائبر سکیورٹی اقدامات کیے جائیں گے، سائبر سکیورٹی کے لیے وزارت آئی ٹی، این آئی ٹی بی اور دیگر متعلقہ اداروں کے ساتھ قریبی تعاون کیا جائے گا۔

اعلامیے کے مطابق سیکرٹری وزارت آئی ٹی ضرار ہاشم خان نے سپریم کورٹ کو مکمل تکنیکی تعاون کی یقین دہانی کرائی جبکہ این آئی ٹی بی سائبر سکیورٹی، سافٹ ویئر ڈویلپمنٹ، ڈیجیٹل سروسز اور آئی ٹی انفراسٹرکچر میں معاونت فراہم کرے گا۔

اعلامیے میں کہا گیا ہے کہ مفاہمتی یادداشت عدالتی خدمات کو جدید بنانے، انفارمیشن سسٹمز کو محفوظ بنانے اور سائلین و وکلا کو بہتر سہولیات فراہم کرنے کی جانب اہم قدم ہے۔