(لاہور نیوز) سنٹرل پولیس آفس میں پنجاب پولیس انٹرن شپ پروگرام کے 14ویں بیچ کی اختتامی تقریب منعقد ہوئی، آئی جی پنجاب عبدالکریم اور سینئر پولیس افسران نے انٹرن شپ مکمل کرنے والے طلبا و طالبات میں اسناد تقسیم کیں۔

تقریب سے خطاب کرتے ہوئے آئی جی پنجاب عبدالکریم نے کہا کہ انٹرن شپ کے دوران حاصل ہونے والا عملی تجربہ طلبا و طالبات کی کیرئیر ڈویلپمنٹ میں معاون ثابت ہوگا۔ تعلیم و تحقیق کے کلچر کو فروغ دینے کے لیے طلبا و طالبات کو پولیس انٹرن شپ کے مواقع فراہم کیے جا رہے ہیں۔

ترجمان پنجاب پولیس کے مطابق پنجاب یونیورسٹی کے 38 جبکہ گورنمنٹ کالج یونیورسٹی کے 27 طلبا و طالبات نے انٹرن شپ پروگرام میں حصہ لیا۔ طلبا و طالبات کو پانچ گروپس میں تقسیم کرکے پنجاب پولیس کی مختلف برانچز میں پانچ ہفتوں کے لیے اٹیچ کیا گیا۔

انٹرن شپ کے دوران طلبا و طالبات نے سی ٹی ڈی، سپیشل برانچ، سیف سٹیز اتھارٹی، انویسٹی گیشن اور آئی ٹی برانچز میں عملی تجربہ حاصل کیا۔ انٹرنز نے انٹرن شپ کے دوران حاصل کیے گئے تجربات پر مبنی پریزنٹیشن رپورٹس بھی پیش کیں۔

طلبا و طالبات نے اظہار خیال کرتے ہوئے کہا کہ انہیں پولیس ورکنگ اور فیلڈ چیلنجز کو قریب سے دیکھنے اور سیکھنے کا موقع ملا، جس پر وہ آئی جی پنجاب کے شکر گزار ہیں۔

تقریب میں ایڈیشنل آئی جی ٹریننگ عاصم گلزار، ڈی آئی جی ٹریننگ منیر احمد ضیاء راؤ، ڈی آئی جی آر اینڈ ڈی انعام وحید، اے آئی جی ٹریننگ اور دیگر افسران نے شرکت کی۔

گورنمنٹ کالج یونیورسٹی کی ڈائریکٹر انسٹیٹیوٹ اکیڈمک پلاننگ اینڈ ایکسٹرنل لنکس ڈاکٹر فوزیہ شاہین، کوآرڈینیٹر فرانزک کیمسٹری ڈاکٹر صدرہ فرید اور پنجاب یونیورسٹی کی ریسرچ آفیسر روحمہ شہزاد بھی تقریب میں شریک ہوئیں۔

Follow Lahore News on X

Install our App