(لاہور نیوز) محرم الحرام کے دوران امن و امان کی صورتحال برقرار رکھنے کے لیے لاہور پولیس نے پاک فوج اور پنجاب رینجرز کی دو، دو کمپنیوں کی خدمات طلب کر لیں جبکہ فضائی نگرانی کے لیے ہیلی کاپٹر کی بھی ڈیمانڈ کی گئی ہے۔
پولیس حکام کے مطابق محرم کے مرکزی جلوسوں اور حساس مقامات کی سکیورٹی مزید مؤثر بنانے کے لیے اضافی نفری مانگی گئی ہے تاکہ کسی بھی ناخوشگوار واقعے سے بروقت نمٹا جا سکے۔
حکام کا کہنا ہے کہ مرکزی جلوسوں کی نگرانی کے لیے اینٹی ڈرون ٹیکنالوجی استعمال کی جائے گی، جبکہ جلوسوں کے اطراف ڈرون اڑانے پر مکمل پابندی عائد ہو گی۔
سکیورٹی حکام کے مطابق محرم کے دوران موبائل فون سروس بند نہ کرنے سے متعلق سابق نگران وزیراعلیٰ محسن نقوی کا فیصلہ برقرار رکھا جائے گا اور اس حوالے سے موجودہ سکیورٹی پلان بھی اسی پالیسی کے تحت ترتیب دیا جا رہا ہے۔
پولیس کا کہنا ہے کہ محرم الحرام کے دوران جلوسوں اور مجالس کے تحفظ کے لیے تمام ضروری انتظامات کو حتمی شکل دی جا رہی ہے۔
