(لاہور نیوز) عالمی یوم مزدور کے موقع پر پنجاب پولیس نے محنت کشوں کی خدمات کو خراجِ تحسین پیش کرتے ہوئے ان کے حقوق کے تحفظ اور سکیورٹی کی فراہمی کے عزم کا اعادہ کیا ہے۔
انسپکٹر جنرل پنجاب پولیس عبدالکریم نے اپنے پیغام میں کہا کہ ملک کی تعمیر و ترقی اور معاشی سرگرمیوں کے فروغ میں مزدور طبقے کا کردار نہایت اہم ہے اور پنجاب پولیس ان کی خدمات کو سلام پیش کرتی ہے۔
انہوں نے کہا کہ مریم نواز شریف کے مزدور دوست ویژن کے تحت محنت کش طبقے کا تحفظ اولین ترجیح ہے۔ آئی جی پنجاب کے مطابق عالمی یوم مزدور کے حوالے سے منعقد ہونے والی ریلیوں اور دیگر تقریبات کو فول پروف سکیورٹی فراہم کی جائے گی۔
آئی جی پنجاب نے واضح کیا کہ محنت کشوں اور گھریلو ملازمین کے استحصال اور ان پر تشدد کے خلاف زیرو ٹالرنس پالیسی اپنائی گئی ہے، جبکہ چائلڈ لیبر اور جبری مشقت کے خاتمے کے لیے متعلقہ اداروں کے ساتھ مکمل تعاون جاری ہے۔
