
(ویب ڈیسک) پنجاب کے نجی میڈیکل کالجز میں داخلے کیلئے عبوری میرٹ لسٹ جاری کر دی گئی۔
یونیورسٹی آف ہیلتھ سائنسز نے 8104 درخواست گزاروں کی میرٹ کے مطابق فہرست ویب سائٹ پر اپ لوڈ کر دی ہے، میرٹ لسٹ اوپن میرٹ اور اوورسیز کیٹیگری کیلئے علیحدہ علیحدہ جاری کی گئی ہے، اس میرٹ لسٹ کی بنیاد پر امیدواروں کو میڈیکل کالجز الاٹ ہوں گے۔
نجی میڈیکل کالجز کا میرٹ 80.3 فیصد کے قریب رہنے کی توقع ہے، پہلی سلیکشن لسٹ 5 فروری کو جاری کی جائے گی جس کے بعد امیدواروں کو کالج فیس جمع کرانے اور جوائننگ کے لئے زیادہ سے زیادہ 3 دن دیئے جائیں گے۔
امیدواروں کی سہولت کے لئے تمام میڈیکل کالجز میں داخلہ ٹیمیں تشکیل دے دی گئی ہیں، وائس چانسلر یو ایچ ایس کی ہدایت پر سینئر فیکلٹی ممبرز کو داخلوں کے لئے فوکل پرسن کے طور پر نامزد کیا گیا ہے۔
دوسری سلیکشن لسٹ 10 فروری کو جاری کی جائے گی، جس کے بعد مزید داخلوں کا عمل شروع ہو جائے گا۔