لاہور میں نجی یونیورسٹی میں ’ڈیجیٹل اثاثوں اور بینکاری‘ کے مستقبل کے موضوع پر منعقدہ مکالمے سے خطاب کرتے ہوئے بلال بن ثاقب کا کہنا تھا کہ پاکستان کو عالمی مالیاتی منظرنامے میں نمایاں مقام حاصل کرنے کے لیے مالیاتی جدت اور جدید ٹیکنالوجی کو اپنانا ہوگا۔

انہوں نے کہا کہ ڈیجیٹل اثاثے اور بلاک چین ٹیکنالوجی ملک کے مالیاتی نظام میں انقلابی تبدیلی لانے کی صلاحیت رکھتے ہیں، جبکہ ترسیلات زر کی لاگت میں صرف 2 سے 3 فیصد کمی سے ملکی معیشت کو ایک ارب ڈالر کا اضافی فائدہ پہنچایا جا سکتا ہے۔

 وزیر مملکت کا کہنا تھا کہ پاکستان محض جدید ٹیکنالوجی استعمال کرنے والا ملک نہیں بلکہ عالمی مالیاتی نظام کے نئے قواعد کی تشکیل میں بھی اپنا کردار ادا کر رہا ہے۔

بلال بن ثاقب نے کہا کہ بلاک چین ٹیکنالوجی کے امکانات صرف بٹ کوائن اور کرپٹو کرنسی کی تجارت تک محدود نہیں بلکہ اس کے ذریعے مالیاتی شمولیت کو فروغ دینے اور سرمایہ کاری کے نئے مواقع پیدا کرنے کی وسیع گنجائش موجود ہے۔

اُن کا کہنا تھا کہ پاکستان کو مستقبل کے مالیاتی نظام میں اپنا کردار خود متعین کرنا ہوگا، جس کے لیے جدید ٹیکنالوجی اور مالیاتی جدت کو ترجیح دینا ضروری ہے۔

وزیر مملکت نے کہا کہ پاکستان کو سالانہ تقریباً 41 ارب ڈالر کی ترسیلات زر موصول ہوتی ہیں، جدید مالیاتی ٹیکنالوجی کے استعمال سے رقوم کی منتقلی کے نظام کو مزید مؤثر بنایا جا سکتا ہے جب کہ ترسیلات زر کی منتقلی پر آنے والی لاگت میں صرف 2 سے 3 فیصد کمی سے ملکی معیشت کو ایک ارب ڈالر کا اضافی فائدہ حاصل ہو سکتا ہے۔

بلال بن ثاقب نے بتایا کہ ترسیلات زر کی لاگت کم کرنے کے لیے پیوارا اور سٹیٹ بینک آف پاکستان مشترکہ ورکنگ گروپ کے قیام پر کام کر رہے ہیں۔

اُن کا مزید کہنا تھا کہ خلیجی ممالک سے پاکستان رقوم کی منتقلی کے لیے ایک پائلٹ منصوبے پر بھی غور کیا جا رہا ہے، جس کا مقصد جدید مالیاتی ٹیکنالوجی کے ذریعے ترسیلات زر کے نظام کو زیادہ مؤثر، آسان اور کم لاگت بنانا ہے۔