11 Sep 2026
(لاہور نیوز) موسم میں تبدیلی کے باوجود لاہور سمیت پنجاب بھر میں بجلی کی غیر اعلانیہ اور جبری لوڈشیڈنگ پر قابو نہ پایا جا سکا۔
ذرائع کے مطابق لیسکو ریجن کے مختلف علاقوں میں رات کے اوقات میں وقفے وقفے سے 40 منٹ سے ایک گھنٹے تک جبری لوڈشیڈنگ کا سلسلہ جاری ہے، دن کے اوقات میں سولر سسٹمز کے باعث بجلی کی طلب نسبتاً کم رہتی ہے، تاہم شام اور رات کے وقت سولر سسٹمز بند ہونے سے بجلی کی اوسط طلب بڑھ کر تقریباً 4 ہزار 800 میگاواٹ تک پہنچ جاتی ہے، جس کے باعث شہری شدید مشکلات کا شکار ہیں جبکہ کاروباری سرگرمیاں بھی بری طرح متاثر ہو رہی ہیں۔
ذرائع کے مطابق طلب میں اضافے اور سسٹم پر اضافی بوجھ پڑنے کے باعث مختلف علاقوں میں جبری اور غیر اعلانیہ لوڈشیڈنگ شروع کر دی جاتی ہے، سسٹم پر لوڈ بڑھنے کے باعث شہر کے گنجان آباد علاقوں میں تکنیکی خرابیوں اور ٹرانسفارمرز خراب ہونے کی شکایات میں بھی نمایاں اضافہ ہوا ہے، تکنیکی خرابیوں کے باعث متعدد علاقوں میں شہریوں کو کئی کئی گھنٹے بجلی کی بندش کا سامنا کرنا پڑتا ہے۔
بجلی کی مسلسل بندش سے شہریوں میں تشویش پائی جاتی ہے جبکہ کاروباری سرگرمیاں بھی متاثر ہو رہی ہیں، صارفین نے بجلی کی غیر اعلانیہ لوڈشیڈنگ کا سلسلہ فوری ختم کرنے اور تکنیکی خرابیوں کو ترجیحی بنیادوں پر دور کرنے کا مطالبہ کیا ہے۔
آپ کی اس خبر کے متعلق رائے
