(ویب ڈیسک) پاکستانی ٹیلی ویژن کی سینئر اداکارہ حمیرا بانو نے اپنی شادی کی خبر سوشل میڈیا کے ذریعے مداحوں کے ساتھ شیئر کردی، اداکارہ نے شوہر کے ہمراہ تصاویر بھی پوسٹ کیں، تاہم ان کے شوہر کا چہرہ اور شناخت ظاہر نہیں کی گئی۔

حمیرا بانو کی جانب سے شیئر کی گئی تصاویر میں وہ اپنے شوہر کے ہمراہ موجود ہیں، تاہم اداکارہ نے شوہر کا چہرہ کیمرے کی جانب نہیں کیا، جس کے باعث تصاویر میں ان کی پشت دکھائی دے رہی ہے۔

تصاویر کے ساتھ حمیرا بانو نے ایک جذباتی پیغام بھی شیئر کیا، انہوں نے لکھا  کہ کبھی کبھی ہم اپنے لیے کچھ منصوبہ بندی کرتے ہیں لیکن اللہ ہمارے لیے کچھ اور منصوبہ رکھتا ہے اور جب رب کن فرما دے تو پھر منزل آسان ہو جاتی ہے۔

اداکارہ کی شادی کی خبر سامنے آنے کے بعد شوبز شخصیات، دوستوں اور مداحوں کی جانب سے انہیں مبارکباد دینے کا سلسلہ شروع ہوگیا، مایا خان، صباحت بخاری، منشا ملک اور عرفان موری والا سمیت متعدد فنکاروں اور دوستوں نے سوشل میڈیا پر حمیرا بانو کے لیے نیک خواہشات کا اظہار کیا۔

مداحوں نے بھی اداکارہ کی پوسٹ پر کمنٹس کرتے ہوئے انہیں نئی زندگی کے آغاز پر مبارکباد دی اور ان کے لیے خوشیوں، محبت اور کامیابی کی دعائیں کیں۔

حمیرا بانو پاکستانی ڈرامہ انڈسٹری کی تجربہ کار اداکاراؤں میں شمار ہوتی ہیں، انہوں نے اپنے طویل فنی سفر کے دوران متعدد مقبول ڈراموں میں اداکاری کے جوہر دکھائے اور ناظرین میں اپنی منفرد شناخت بنائی۔

اداکارہ کو بالخصوص ماں کے کرداروں میں بے حد پسند کیا جاتا ہے، ان کے نمایاں ڈراموں میں امید، مہرپوش، میرا رب وارث، ملالِ یار، ڈولی ڈارلنگ، میرے اپنے، بے نام، بنو، دیوانگی اور محروم شامل ہیں۔

حمیرا بانو نے ہمیشہ اپنی نجی زندگی کو میڈیا کی توجہ سے دور رکھا ہے، یہی وجہ ہے کہ ان کی شادی کی اچانک خبر نے مداحوں کو حیران کردیا، شادی کی خبر سامنے آنے کے بعد شوبز حلقوں اور مداحوں کی جانب سے انہیں مبارکباد دینے کا سلسلہ جاری ہے۔

Subscribe Lahore News on YouTube

Install our App