(لاہور نیوز) تھانہ چوہنگ پولیس نے بڑی کارروائی کرتے ہوئے بین الاضلاعی مویشی چور گینگ کے 3 کارندوں کو گرفتار کر لیا۔
پولیس کے مطابق شاہ پور مویشی منڈی کے قریب چھاپہ مار کارروائی کے دوران مسلح ملزمان کو گرفتار کیا گیا، گرفتار ہونے والوں میں غلام مصطفیٰ، محمد عثمان اور محمد حسین شامل ہیں۔
ایس ایچ او چوہنگ کے مطابق ملزمان کے قبضے سے چوری شدہ بھینس، کٹی اور واردات میں استعمال ہونے والی پک اپ گاڑی برآمد کر لی گئی، جبکہ ناجائز اسلحہ اور گولیاں بھی تحویل میں لے لی گئیں۔
پولیس کا کہنا ہے کہ برآمد شدہ مالِ مسروقہ حویلی بابا بلے شاہ کے علاقے سے چوری کیا گیا تھا، ملزمان کے خلاف مقدمہ درج کرکے انہیں مزید تفتیش کیلئے انویسٹی گیشن ونگ کے حوالے کر دیا گیا ہے۔
اس موقع پر ایس پی صدر عبداللہ عمران چیمہ کا کہنا تھا کہ جرائم پیشہ عناصر کے خلاف زیرو ٹالرنس پالیسی پر سختی سے عمل جاری رہے گا۔
