(لاہور نیوز) عیدالاضحیٰ کے موقع پر شہر بھر میں صفائی آپریشن کیلئے ایل ڈبلیو ایم سی نے تیاریاں شروع کر دی ہیں۔

لاہور ویسٹ مینجمنٹ کمپنی  نے چار روزہ خصوصی آپریشن کیلئے 2 ہزار سے زائد مشینری کرائے پر لینے کا فیصلہ کیا ہے۔

ذرائع کے مطابق عیدالاضحیٰ صفائی آپریشن کیلئے 23 کروڑ روپے سے زائد مالیت کا ٹینڈر جاری کر دیا گیا ہے، جبکہ شہر  کے 9 ٹاؤنز میں بھاری مشینری تعینات کی جائے گی۔

صفائی آپریشن کیلئے لاہور میں 979 ڈمپر، 330 ایکسکیویٹر، 492 ٹرالیاں اور 199 لوڈر کرائے پر لئے جائیں گے، علامہ اقبال ٹاؤن میں 6 کروڑ 21 لاکھ روپے کی لاگت سے 274 ڈمپر اور 82 ایکسکیویٹر فراہم کئے جائیں گے۔

نشتر ٹاؤن کیلئے 3 کروڑ 19 لاکھ روپے، سمن آباد ٹاؤن کیلئے 2 کروڑ 94 لاکھ جبکہ گلبرگ ٹاؤن کیلئے 2 کروڑ 47 لاکھ روپے کا بجٹ مختص کیا گیا ہے، اس کے علاوہ راوی ٹاؤن کیلئے ایک کروڑ 19 لاکھ، شالیمار ٹاؤن کیلئے ایک کروڑ 96 لاکھ اور واہگہ ٹاؤن کیلئے ایک کروڑ 55 لاکھ روپے کا تخمینہ لگایا گیا ہے۔

دستاویزات کے مطابق ڈمپر کا یومیہ کرایہ ایک لاکھ 49 ہزار 743 روپے، ایکسکیویٹر کا ایک لاکھ 44 ہزار 659 روپے مقرر کیا گیا ہے، اسی طرح ٹریکٹر لوڈر 65 ہزار 837 روپے جبکہ ٹرالی 56 ہزار 667 روپے یومیہ کے حساب سے کرائے پر حاصل کی جائے گی۔

حکام کے مطابق ٹھیکیدار مشینری کے ساتھ ڈرائیور، ہیلپر اور فیول بھی فراہم کرے گا جبکہ تمام مشینری کو عید سے ایک رات قبل رات 9 بجے تک کلیکشن پوائنٹس پر پہنچانا لازمی ہو گا، مشینری روزانہ 16 گھنٹے کام کرے گی۔

ستھرا پنجاب اتھارٹی حکام کا کہنا ہے کہ عید پر صفائی کیلئے نئی مشینری خریدنے پر اربوں روپے خرچ ہوں گے، جبکہ کرائے پر مشینری لینے سے اخراجات میں نمایاں کمی آتی ہے۔

Follow Lahore News on Facebook

Install our App