(لاہور نیوز) موسمیاتی تبدیلی اور ماحولیاتی آلودگی کے تدارک کیلئے لاہور رنگ روڈ اتھارٹی کے تحت بڑے پیمانے پر شجرکاری مہم جاری ہے، جس کے دوران اب تک ڈیڑھ لاکھ سے زائد پودے اور درخت لگائے جا چکے ہیں۔
یہ پیش رفت صوبائی وزیر تعمیرات و مواصلات ملک صہیب احمد بھرتھ کی زیر صدارت اجلاس میں سامنے آئی، جس میں رنگ روڈ اتھارٹی کے افسران نے شرکت کی اور منصوبے پر بریفنگ دی۔
صوبائی وزیر کو بتایا گیا کہ گزشتہ دس ماہ کے دوران لاہور رنگ روڈ کے اطراف بڑے پیمانے پر شجرکاری کی گئی ہے، جبکہ پودوں اور درختوں کی نشوونما کی مانیٹرنگ جدید جیو ٹیکنالوجی کے ذریعے کی جا رہی ہے، ہر پودے کی ڈیجیٹل تصدیق بھی "پلانٹ فار پاکستان" پورٹل کے تحت کی جا رہی ہے۔
بریفنگ کے مطابق نیازی شہید، قائداعظم اور میاں نواز شریف انٹرچینجز سمیت مختلف مقامات پر شجرکاری کی گئی، جبکہ ایئرپورٹ تا عسکری ٹین، ایئرپورٹ تا غازی سٹی اور ایس ایل تھری سیکشن پر بھی پودے لگائے گئے ہیں، اس مہم میں آکسیجن پاکٹس کے قیام کو بھی مدنظر رکھا گیا ہے۔
ملک صہیب احمد بھرتھ نے ہدایت کی کہ جون تک مزید 30 ہزار پودے لگائے جائیں اور شجرکاری مہم کو مزید تیز کیا جائے، پنجاب حکومت ماحولیاتی بہتری کیلئے مؤثر اقدامات کر رہی ہے اور اس مہم سے سموگ میں واضح کمی لانے میں مدد ملے گی۔
انہوں نے مزید کہا کہ شجرکاری کے باعث لاہور رنگ روڈ کی خوبصورتی میں بھی نمایاں اضافہ ہوا ہے۔
