(لاہور نیوز) وزیر اعلی پنجاب مریم نواز نے وزیر ٹرانسپورٹ کے ہمراہ بٹن دبا کر الیکٹرک بسوں کا افتتاح کر دیا، اس موقع پر افتتاحی تقریب سے خطاب کرتے ہوئے انہوں نے کہا کہ عوام کوریلیف فراہمی ترجیح ہے جبکہ پنجاب میں پہلی مرتبہ الیکٹرک بسیں بھی نواز شریف نے ہی متعارف کرائی ہیں۔

وزیر اعلی پنجاب مریم نواز شریف  نے وزیر ٹرانسپورٹ کے ہمراہ بٹن دبا کر الیکٹرک بسوں کا افتتاح کیا، الیکٹرک بسوں کی افتتاحی تقریب سے خطاب کرتے ہوئے مریم نواز نے کہا کہ عوام کی سہولت کیلئے ماحول دوست الیکٹرک بسیں لا رہےہیں، عوام کو ریلیف پر نواز شریف اور مجھ سے زیادہ کوئی خوش نہیں ہوتا۔

مریم نواز  نے کہا کہ گرین اور کلین پنجاب منصوبہ آج ایک حقیقت بن چکا ہے، آج میں نے گرین بس میں سفر کیا، 27 بسیں پنجاب آ چکی ہیں جو کل سے سڑکوں پر ہوں گی، الیکٹرک بسوں کا کرایہ انتہائی کم رکھا گیا ہے، یہ کرایہ تمام صوبوں سےکم ہے جبکہ بسوں میں فری وائی فائی اور چارجنگ کی سہولت بھی ہو گی۔

انہوں نے کہا کہ تمام بسوں کے اندر سی سی ٹی وی لگے ہیں، طلبا اور خصوصی افراد کو الیکٹرک بسوں کا کارڈ مفت ملے گا، سموگ کے خاتمے کیلئے پنجاب حکومت نے اقدامات کئے ہیں، الیکٹرک بسوں میں شہریوں کیلئے مختلف سہولیات ہیں، الیکٹرک بس میں سفر کے دوران خواتین کا تحفظ یقینی بنایا جائے گا۔

وزیر اعلی پنجاب کا کہنا تھا کہ عوام کو سستی اور محفوظ ٹرانسپورٹ کی سہولت کیلئے اقدامات کر رہے ہیں، ایسے پراجیکٹ شروع ہونے سے سب کو حیرانی ہوتی ہے، کوئی بھی منصوبہ دیکھ لیں اس پر نواز شریف کی مہر ہے، پہلے تو دھنگا فساد چلتا رہا، ڈویلپمنٹ مسلم لیگ (ن) کا برانڈ ہے، باقی صوبوں کے پاس تو کام بتانے کیلئے ہے نہیں۔

مریم نواز نے کہا کہ سب کے سامنےحلفاً کہتی ہوں ایک بھی پراجیکٹ شہباز شریف سے نہیں مانگا، میری کوشش ہوتی ہے کہ پنجاب کے وسائل سے پراجیکٹ لانچ کریں،خدمت میں مسلم لیگ ن کی ایک پوری تاریخ ہے، پنجاب کے بجٹ سے ترقیاتی منصوبے شروع کیے ہیں، موٹرویز سمیت تمام منصوبوں پر مسلم لیگ ن کی مہر لگی ہوئی ہے۔

ان کا کہنا تھا کہ اگر کوئی سوال پوچھے پہلی ایئر ایمبولینس کس  نے بنائی، نواز شریف نے، لاہور میں پہلا نواز شریف کینسر ہسپتال بن رہا ہے، اپنا گھر سکیم  کے تحت 20 ہزار گھروں کیلئے قرضے دیئے جا چکے ہیں، ہر دفعہ ملک کو بحرانوں سے نواز شریف نے نکالا، کچھ تلخ حقائق بھی ہیں جواب دیں یا نہ دیں سب کو پتا ہے۔

مریم نواز  نے کہا کہ کون ہے جس نے پاکستان میں فتنہ، فساد شروع کیا نام بتانےکی ضرورت نہیں، آج وہ سزا بھگت رہے ہیں، میں صبح سے شام تک پنجاب میں خدمت کر رہی ہوں،گوگی اور پنکی دور میں رشوت کے بغیر کوئی کام نہیں ہوتا تھا، ملک پر حملہ کرنےکا دھبہ کس پر لگا؟نام نہیں لینا لیکن نام تو آتا ہے۔

وزیر اعلی پنجاب نے کہا کہ نو مئی کو جناح ہاؤس پر حملہ کیا گیا، پہلی بارشہدا کی یادگاروں پر کس نے حملہ کیا؟ نام نہیں لینا چاہتی، ہم نوجوانوں کو لیپ ٹاپ اور الیکٹرک بائیکس دے رہےہیں، یہ نوجوانوں کو پٹرول بم اور کیلوں والے ڈنڈے دیتے ہیں، انہوں نے پاکستان کی تباہی کر دی۔

مریم نواز شریف نے مزید کہا کہ کل نارووال دیکھا صاف ستھرا تھا، ستھرا پنجاب مہم  کے تحت شہر، شہر صفائی ہو رہی ہے، نوازشریف نے ملک کو بحران سے نکال دیا ہے، ملک بار بار دھنگا، فساد اور بدتمیزی کا متحمل نہیں ہو سکتا، ملک کی ترقی کیلئے ن لیگ کی حکومت کا تسلسل برقرار رہنا چاہیے۔

Follow Lahore News on Twitter

Install our App