
(لاہور نیوز) ملک بھر میں 7 روزہ انسدادِ پولیو مہم کا آغاز ہو گیا، ساڑھے چار کروڑ سے زائد بچوں کو پولیو سے بچاؤ کے قطرے پلائے جائیں گے۔
پنجاب بھر میں 2 کروڑ 33 لاکھ سے زائد بچوں کو پولیو کے قطرے پلانے کا ہدف مقرر کیا گیا ہے، کراچی سمیت سندھ بھر میں ایک کروڑ 6 لاکھ سے زائد بچوں کو پولیو ویکسین دی جائے گی، بلوچستان کے مختلف اضلاع میں 26 لاکھ 60 ہزار بچوں کو قطرے پلائے جائیں گے۔
اس کے علاوہ خیبرپختونخوا میں 72 لاکھ 99 ہزار بچوں کو پولیو ویکسین پلائی جائے گی، اسلام آباد، آزاد کشمیر اور گلگت بلتستان میں 8 لاکھ سے زائد بچے پولیو ویکسین سے مستفید ہوں گے، انسدادِ پولیو مہم کیلئے تربیت یافتہ ورکرز کی ٹیمیں تشکیل دی گئی ہیں جو گھر گھر جا کر بچوں کو پولیو سے بچاؤ کے قطرے پلائیں گی۔
عوام اور پولیو ورکرز کا کہنا ہے کہ پولیو وائرس کا خاتمہ قومی ہدف ہے، والدین ویکسین کی اہمیت کو سمجھیں اور اپنے بچوں کو قطرے لازمی پلوائیں۔
سات روزہ انسدادِ پولیو مہم 9 فروری تک ملک بھر میں جاری رہے گی۔