(لاہور نیوز) پاکستان مسلم لیگ ن کی حکمت عملی میں بڑی تبدیلی سامنے آ گئی۔ پاکستان ڈیمو کریٹک موومنٹ کے سربراہی اجلاس میں شہباز شریف شرکت کریں گے۔
ذرائع کے مطابق مریم نواز پی ڈی ایم کے 11 اگست کو اسلام آباد میں ہونے والے اجلاس میں شرکت نہیں کریں گی۔ اجلاس میں پی ڈی ایم کے مستقبل اور حکومت کے خلاف نئی تحریک کے حوالے سے اہم مشاورت ہو گی۔ ذرائع ن لیگ کے مطابق کشمیر اور سیالکوٹ الیکشن میں شکست کے بعد شہباز شریف خود سیاسی محاذ سنبھالیں گے۔ وہ پی ڈی ایم کے آئندہ ہونے والے جلسوں میں بھی خطاب کریں گے۔ ذرائع ن لیگ کے مطابق شہباز شریف پیپلز پارٹی سے بھی رابطے میں ہیں اور قومی اسمبلی میں پیپلز پارٹی ن لیگ کا ہر ایشو پر ساتھ دے گی۔ ذرائع کے مطابق حمزہ شہباز بھی پنجاب کی سیاست میں بھرپور کردار ادا کریں گے۔ آئندہ ہونے والے پنجاب کے بلدیاتی انتخابات میں حمزہ شہباز لیڈنگ رول ادا کریں گے۔
