پاکستان کی جانب سے ملنے والے 306 رنز کے ہدف کے تعاقب میں سری لنکن ٹیم 268 رنز بنا کر آؤٹ ہوگئی۔

سری لنکا کی جانب سے رتھنائیکے 79 رنز بنا کر نمایاں رہے، جبکہ جنیت لیانج نے 60 رنز کی اننگز کھیلی، کامیندو مینڈس نے 44 اور کوشال مینڈس نے 18 رنز بنائے۔

پاکستان کی جانب سے شاہین شاہ آفریدی نے 3 وکٹیں حاصل کیں جبکہ نسیم شاہ، فہیم اشرف اور حارث رؤف نے 2، 2 کھلاڑیوں کو آؤٹ کیا۔

قبل ازیں راولپنڈی کرکٹ سٹیڈیم میں ہونیوالے میچ میں سری لنکا نے ٹاس جیت کر پاکستان کو پہلے بیٹنگ کی دعوت دی، پہلے بیٹنگ کرتے ہوئے گرین شرٹس کی ٹیم 49.5 اوورز میں 305 رنز بنا کر آل آؤٹ ہوگئی۔

پاکستان کی جانب سے سلمان علی آغا نے شاندار بیٹنگ کا مظاہرہ کرتے ہوئے 107 رنز کی اننگز کھیلی، جبکہ بابر اعظم 45 اور سعد بیگ 39 رنز بنا کر آؤٹ ہوئے۔

حسن نواز نے 37، عرفات منہاس نے 18، فخر زمان نے 16، صائم ایوب نے 7 اور فہیم اشرف نے 6 رنز بنائے۔

سری لنکا کی جانب سے ایشان ملنگا نے 4 وکٹیں حاصل کیں، جبکہ آسیتھا فرنینڈو 3 کھلاڑیوں کو آؤٹ کرنے میں کامیاب رہے۔

واضح رہے کہ ٹرائی سیریز میں پاکستان اور سری لنکا کے علاوہ انگلینڈ کی ٹیم بھی شامل ہے۔

پاکستان کرکٹ بورڈ (پی سی بی) نے سہ ملکی ون ڈے سیریز کے دوران 25 اکتوبر کو پاکستان اور انگلینڈ کے درمیان ون ڈے انٹرنیشنل میچ کو چھاتی کے سرطان سے آگاہی کے کرنے کا اعلان بھی کیا ہے۔

واضح رہے پاکستان، سری لنکا اور انگلینڈ کے درمیان سہ ملکی ون ڈے انٹرنیشنل سیریز 18 سے 31 اکتوبر 2026 تک کھیلی جائے گی، سات میچوں پر مشتمل ٹورنامنٹ میں چھ لیگ میچز اور ایک فائنل شامل ہے۔ تمام میچز راولپنڈی اور لاہور میں کھیلے جائیں گے۔