(لاہور نیوز) مون سون بارشوں کے باعث پنجاب کے مختلف دریاؤں میں سیلابی صورتحال برقرار ہے، تاہم گزشتہ 24 گھنٹوں کے دوران بیشتر دریاؤں میں پانی کا بہاؤ مستحکم رہا اور دریائے چناب میں طغیانی میں کمی ریکارڈ کی گئی۔

پی ڈی ایم اے پنجاب کے مطابق دریائے سندھ میں کالا باغ، چشمہ اور تونسہ کے مقامات پر نچلے درجے کا سیلاب ہے۔ کالا باغ پر پانی کا بہاؤ 3 لاکھ 34 ہزار کیوسک، چشمہ پر 3 لاکھ 70 ہزار کیوسک جبکہ تونسہ بیراج پر 3 لاکھ 13 ہزار کیوسک ریکارڈ کیا گیا۔

ترجمان پی ڈی ایم اے کے مطابق دریائے چناب میں مرالہ، خانکی، قادر آباد اور تریموں کے مقامات پر بھی نچلے درجے کا سیلاب ہے۔ مرالہ پر پانی کا بہاؤ 1 لاکھ 43 ہزار کیوسک، خانکی پر 1 لاکھ 38 ہزار، قادر آباد پر 1 لاکھ 35 ہزار جبکہ تریموں پر 1 لاکھ 84 ہزار کیوسک ریکارڈ کیا گیا۔

پی ڈی ایم اے کا کہنا ہے کہ دریائے ستلج اور جہلم میں پانی کا بہاؤ معمول کے مطابق ہے، جبکہ دریائے راوی میں بلوکی اور ہیڈ سدھنائی کے مقامات پر نچلے درجے کی سیلابی صورتحال برقرار ہے۔ بلوکی پر پانی کا بہاؤ 81 ہزار اور ہیڈ سدھنائی پر 60 ہزار کیوسک ریکارڈ کیا گیا، جبکہ جسڑ شاہدرہ پر پانی کا بہاؤ معمول کے مطابق ہے۔

ادھر نارووال کے نالہ بسنتر میں نچلے درجے جبکہ وزیرآباد کے نالہ پھلکو میں اونچے درجے کا سیلاب ہے۔ نالہ پھلکو میں پانی کا بہاؤ 5 ہزار کیوسک ریکارڈ کیا گیا۔

ڈی جی پی ڈی ایم اے عمر عباس میلہ کے مطابق بالائی علاقوں میں ہونے والی بارشوں سے دریاؤں کے بہاؤ میں اضافہ ہوا، تاہم دریائے چناب کے بالائی کیچمنٹ میں بارشیں رکنے کے باعث گزشتہ 24 گھنٹوں کے دوران دریائے چناب میں سیلابی صورتحال میں نمایاں بہتری آئی ہے۔

Follow Lahore News on X

Install our App