(لاہور نیوز) سی سی پی او لاہور بلال صدیق کمیانہ نے کہا ہے کہ یومِ عاشور کے موقع پر لاہور میں موٹر سائیکل کی ڈبل سواری پر پابندی عائد ہے اور دفعہ 144 پر من و عن عملدرآمد یقینی بنایا جا رہا ہے۔
لاہور پولیس نے کہا کہ آج شہر بھر میں 231 مجالس اور 45 عزاداری جلوسوں کو بھرپور سکیورٹی فراہم کی جا رہی ہےاور عزاداروں کے تحفظ کے لیے چار درجاتی سکیورٹی حصار قائم کیا گیا ہے، جبکہ شہر بھر میں سکیورٹی انتظامات کی مسلسل نگرانی کی جا رہی ہے۔
حکام کے مطابق سیف سٹیز اتھارٹی اور دیگر کنٹرول رومز سے جلوسوں اور مجالس کی مانیٹرنگ جاری ہے۔
علاوہ ازیں،ڈولفن سکواڈ ، پیرو فورس اور ٹریفک پولیس کے اہلکار بھی سکیورٹی ڈیوٹی پر مامور ہیں تاکہ یومِ عاشور کے موقع پر امن و امان کی صورتحال برقرار رکھی جا سکے۔
شہریوں سے اپیل کی گئی ہے کہ وہ سکیورٹی اداروں کے ساتھ مکمل تعاون کریں، ٹریفک اور سکیورٹی ہدایات پر عمل کریں اور کسی بھی مشکوک سرگرمی کی فوری اطلاع متعلقہ حکام کو دیں۔
