ذہنی معذوری کے شکار شخص کا مقدمہ قابل سماعت قرار، عدالت نے درخواست مسترد کر دی
لاہور: (محمد اشفاق) لاہور ہائیکورٹ نے ذہنی معذوری کے شکار شخص کی جانب سے بھائی کے ذریعے دائر وراثتی جائیداد کا مقدمہ قابل سماعت قرار دینے کا فیصلہ برقرار رکھتے ہوئے بہن مسرت محمد دین کی آئینی درخواست مسترد کر دی۔
جسٹس مزمل اختر شبیر نے 9 صفحات پر مشتمل فیصلے میں قرار دیا کہ ذہنی معذوری کے شکار شخص کا مقدمہ دائر کرنے کے لیے پہلے کورٹ آف پروٹیکشن سے سرپرست مقرر کروانا لازمی نہیں۔ سول کورٹ بھی ذہنی معذوری کا جائزہ لے کر مقدمے کی حد تک سرپرست مقرر کر سکتی ہے۔
عدالت نے قرار دیا کہ ذہنی معذوری کا حتمی تعین شہادتیں ریکارڈ کرنے کے بعد بھی کیا جا سکتا ہے اور فریقین کو اپنا مؤقف پیش کرنے کا موقع دیا جا سکتا ہے۔
درخواست گزار مسرت محمد دین نے مؤقف اختیار کیا تھا کہ ان کے ذہنی معذور بھائی صفدر علی نے وراثتی جائیداد انہیں بطور تحفہ منتقل کی تھی۔ ان کے مطابق بھائی کی جانب سے سرپرست کے ذریعے مقدمہ دائر کرنے کے لیے قانونی طریقہ کار اختیار نہیں کیا گیا۔
فیصلے کے مطابق سول کورٹ نے صفدر علی کو ذاتی طور پر طلب کرکے سوالات کیے، تاہم وہ اپنے نام اور رشتوں کی شناخت کے علاوہ دیگر سوالات کے جواب نہیں دے سکے۔
سول کورٹ نے صفدر علی کے بھائی محمد یعقوب کے ذریعے دائر مقدمہ قابل سماعت قرار دیتے ہوئے متنازعہ جائیداد مزید منتقل کرنے سے روک دیا تھا۔
لاہور ہائیکورٹ نے قرار دیا کہ ذہنی معذوری کے شکار شخص کے قانونی مفادات کا تحفظ عدالت کی ذمہ داری ہے، جبکہ جائیداد مزید منتقل ہونے سے نئے مقدمات اور قانونی پیچیدگیاں پیدا ہو سکتی ہیں۔
عدالت نے سول کورٹ اور ایڈیشنل ڈسٹرکٹ جج چنیوٹ کے فیصلے درست قرار دیتے ہوئے مسرت محمد دین کی آئینی درخواست خارج کر دی۔
