(لاہور نیوز) موسم سرما شروع ہوتے ہی ایل پی جی کی قیمتوں میں خودساختہ اضافے کا سلسلہ شروع ہو گیا۔
لاہور سمیت پنجاب بھر میں ایل پی جی سرکاری نرخوں پر دستیاب نہ ہونے سے شہری پریشانی کا شکار ہو گئے، اوگرا کی جانب سے رواں ماہ ایل پی جی کی فی کلو قیمت 294 روپے 7 پیسے مقرر کی گئی ہے، تاہم شہر کے مختلف علاقوں میں ایل پی جی 550 سے 650 روپے فی کلو تک فروخت کی جا رہی ہے۔
ایل پی جی کی قیمتوں میں مسلسل اضافے کے باعث شہریوں کے ساتھ دکاندار بھی پریشان ہیں، شہریوں کا کہنا ہے کہ ہر سال موسم سرما شروع ہوتے ہی ایل پی جی مافیا سرگرم ہو جاتا ہے اور قیمتوں کو کنٹرول کرنا خواب بن کر رہ گیا ہے۔
شہریوں کا کہنا ہے کہ مہنگائی نے پہلے ہی زندگی مشکل بنا رکھی ہے، اب ایل پی جی کی قیمتوں میں اضافے سے غریب آدمی کیلئے دو وقت کی روٹی کا انتظام کرنا بھی مشکل ہو گیا ہے، ایل پی جی خریدنا عام آدمی کی پہنچ سے باہر ہوتا جا رہا ہے۔
دوسری جانب دکانداروں کا کہنا ہے کہ ایل پی جی مہنگے داموں مل رہی ہے، پلانٹس سے ہی گیس مہنگی خریدنی پڑتی ہے تو اوگرا کے مقرر کردہ نرخوں پر فروخت کیسے ممکن ہے، قیمتوں میں اضافے سے ان کا کاروبار بھی متاثر ہو رہا ہے۔
