(محمد اشفاق) چیف جسٹس لاہور ہائیکورٹ مس عالیہ نیلم نے وہاڑی میں پنجاب کے پہلے جینڈر بیسڈ وائلنس (صنفی بنیاد پر تشدد) کے متاثرین کے لیے مخصوص کمرے کا افتتاح کر دیا۔

اس اقدام کا مقصد تشدد سے متاثرہ افراد کو محفوظ، پُرسکون اور سازگار ماحول فراہم کرنا ہے، جہاں وہ اپنی شکایات اور مسائل بلاخوف بیان کر سکیں، کمرے میں متاثرین کی رازداری اور تحفظ کو یقینی بنانے پر خصوصی توجہ دی جائے گی۔

چیف جسٹس عالیہ نیلم نے اپنے دوروں کے دوران پاکپتن اور وہاڑی سمیت مختلف عدالتی مراکز میں متعدد ترقیاتی اور فلاحی منصوبوں کا افتتاح کیا، ان منصوبوں میں ای لائبریریاں، خواتین وکلا کے لیے لیڈی بار رومز، ڈے کیئر سینٹرز، سائلین کے لیے جدید ویٹنگ ایریاز اور سہولت مراکز شامل ہیں۔

ان اقدامات کا مقصد عدالتی سہولیات کو جدید خطوط پر استوار کرنا، خواتین وکلا کو بہتر پیشہ ورانہ ماحول فراہم کرنا اور انصاف کے حصول کے لیے آنے والے شہریوں کی مشکلات کم کرنا ہے۔

عدالتی نظام میں بہتری اور بجلی کی بلاتعطل فراہمی کے لیے پاکپتن، وہاڑی، عارف والا، میلسی اور بورے والا کی عدالتوں اور بار رومز کو سولر انرجی پر منتقل کرنے کے اقدامات بھی کیے گئے ہیں۔

سولر توانائی کے استعمال سے لوڈشیڈنگ کے باعث عدالتی امور اور وکلا کی پیشہ ورانہ سرگرمیوں میں پیدا ہونے والی رکاوٹوں کو کم کرنے میں مدد ملے گی، جبکہ عدالتی عملے، وکلا اور سائلین کو بھی بہتر سہولیات میسر آئیں گی۔

چیف جسٹس لاہور ہائیکورٹ مس عالیہ نیلم کی پاکپتن، عارف والا، وہاڑی، میلسی اور بورے والا آمد پر وکلا تنظیموں کی جانب سے ان کا پرتپاک استقبال کیا گیا اور انہیں پھول پیش کیے گئے، اس موقع پر متعلقہ اضلاع کے سیشن ججز اور جوڈیشل افسران بھی موجود تھے۔

وکلا تنظیموں نے چیف جسٹس عالیہ نیلم کی جانب سے عدالتی نظام میں بہتری، خواتین وکلا کی فلاح و بہبود اور سائلین کو سہولیات کی فراہمی کے لیے کیے گئے اقدامات کو سراہا۔

وکلا نمائندوں نے ان اقدامات پر اظہار تشکر کرتے ہوئے کہا کہ وکلا کی فلاح و بہبود، پیشہ ورانہ ضروریات اور مسائل کے حل کے لیے کیے جانے والے اقدامات حوصلہ افزا ہیں، جدید سہولیات کی فراہمی سے وکلا کو بہتر ماحول میسر آئے گا اور عدالتی امور کی انجام دہی میں بھی بہتری آئے گی۔

پاکپتن اور وہاڑی میں ای لائبریریوں کے قیام سے وکلا کو قانونی تحقیق اور عدالتی فیصلوں تک رسائی میں سہولت ملے گی، جبکہ خواتین وکلا کے لیے لیڈی بار رومز اور ڈے کیئر سینٹرز پیشہ ورانہ ذمہ داریوں کی ادائیگی میں معاون ثابت ہوں گے، اسی طرح جدید ویٹنگ ایریاز اور سہولت مراکز سے عدالتوں میں آنے والے سائلین کو زیادہ آرام دہ اور بہتر ماحول میسر آئے گا۔

وہاڑی میں صنفی بنیاد پر تشدد کے متاثرین کے لیے مخصوص کمرے کا قیام بھی عدالتی نظام میں متاثرین کی ضروریات کو مدنظر رکھنے کی جانب اہم قدم ہے، اس سہولت کے ذریعے متاثرہ افراد کو اپنی شکایات بیان کرنے کے لیے نسبتاً محفوظ اور نجی ماحول فراہم کرنے میں مدد ملے گی۔

چیف جسٹس لاہور ہائیکورٹ عالیہ نیلم کی جانب سے شروع کیے گئے ان ترقیاتی اور فلاحی منصوبوں کو عدالتی بنیادی ڈھانچے کی بہتری، خواتین وکلا کی سہولت، سائلین کی فلاح و بہبود اور انصاف تک رسائی کو آسان بنانے کی کوششوں کا حصہ قرار دیا جا رہا ہے۔

ان اقدامات سے توقع ہے کہ متعلقہ عدالتی مراکز میں سہولیات بہتر ہوں گی اور عدالتی امور کی انجام دہی کے لیے زیادہ سازگار ماحول میسر آئے گا۔

Follow Lahore News on X

Install our App