وزیراعلیٰ پنجاب کی ہدایت پر چلاس کے دو بیمار بچے ایئر ایمبولنس کے ذریعے لاہور منتقل
(لاہور نیوز) وزیر اعلیٰ پنجاب مریم نواز کی ہدایت پر ضلع چلاس سے تعلق رکھنے والے دو بیمار بچوں کو بذریعہ ایئر ایمبولنس لاہور منتقل کر دیا گیا۔
وزیر اطلاعات پنجاب عظمیٰ بخاری کے مطابق سٹنیاں، چلاس سے تعلق رکھنے والے 12 سالہ ثناء اللہ ولد صابر حسین اور 14 سالہ عطاء اللہ ولد صابر حسین موروثی گردوں کی بیماری میں مبتلا ہیں۔
انہوں نے بتایا کہ وزیر اعلیٰ پنجاب کے حکم پر ریسکیو 1122 کی دو گاڑیاں خصوصی طور پر چلاس بچوں کو ریسکیو کرنے کیلئے روانہ کی گئیں جبکہ دونوں بچوں کو مکمل نگہداشت کے ساتھ پاکستان کڈنی اینڈ لیور انسٹی ٹیوٹ منتقل کر دیا گیا ہے۔
وزیر اطلاعات پنجاب کے مطابق پی کے ایل آئی میں ڈاکٹروں کی خصوصی ٹیم بچوں کے مکمل علاج اور نگہداشت کو یقینی بنائے گی, انہوں نے کہا کہ وزیراعلیٰ پنجاب مریم نواز شریف کا ویژن عوام کی بلا تفریق خدمت ہے اور چلاس کے بچوں کی ایئر ایمبولنس کے ذریعے منتقلی اسی وژن کا عملی مظہر ہے۔
وزیر اطلاعات پنجاب کا مزید کہنا تھا کہ مریم نواز انسانیت کی خدمت کو سیاست سے بالاتر رکھنا جانتی ہیں۔
