
(لاہور نیوز) وزیر اعظم شہباز شریف نے جناح سکوائر کا افتتاح کر دیا، اس موقع پر انہوں نے کہا کہ اس منصوبے سے اسلام آباد کے ٹریفک کی روانی میں بہتری آئے گی۔
اسلام آباد میں افتتاحی تقریب سے خطاب ہوتے کرتے ہوئے شہباز شریف کا کہنا تھا کہ آج اسلام آباد میں ٹریفک کے بہاؤ سے متعلق جناح سکوائر منصوبہ مکمل ہوا، اس سے ٹریفک کی روانی میں بہتری آئے گی، جناح سکوائر منصوبے سے آلودگی میں بھی کمی آئے گی کیوں کہ ٹریفک جام نہیں ہو گا تو آلودگی بھی نہیں پھیلے گی اور سب سے بڑھ کر لوگوں کا قیمتی وقت بھی محفوظ ہو گا۔
محمد شہباز شریف کا کہنا تھا کہ جس ذمہ داری اور احساس فرض شناسی سے اس منصوبے کو صرف 72 دنوں میں مکمل کیا گیا ہے، وہ اپنی جگہ ایک ریکارڈ ہے اور اس کے لیے محسن نقوی کو بھرپور خراج تحسین پیش کرنا چاہتا ہوں، انہوں نے اسلام آباد میں پنجاب سپیڈ کو محسن سپیڈ میں تبدیل کر دیا ہے۔
وزیر اعظم نے کہا کہ یہ ہم سب کے لیے خوشی کا موقع ہے جس کا ہم سب کو جشن منانا چاہیے کیوں کہ یہی وہ طریقہ ہے جو قوموں کی زندگی کو بدل دیتا ہے۔
شہباز شریف نے محسن نقوی کو شاباش دیتے ہوئے کہا کہ آپ باقی منصوبوں کی رفتار کو اسی طریقے سے بڑھا کر تکمیل تک پہنچائیں اور 1960 کی دہائی میں جو سرکاری عمارات بنی تھیں ان کو بھی توجہ کی ضرورت ہے اور مجھے سن کر یہ خوشی ہوئی کہ آپ اس پر بھی توجہ دے رہے ہیں۔
وزیر اعظم نے وزیر داخلہ کو مخاطب کرتے ہوئے کہا کہ میں نے آپ کو اسلام آباد کی خوبصورتی سے متعلق جو تجویز دی ہے اس شہر کو پاکستان بھر میں خوبصورتی کے حوالے سے ایک مثال بنا دیں، مجھے یقین ہے کہ آپ اس منصوبے کو بہت جلد پایہ تکمیل تک پہنچائیں گے۔
آخر میں وزیر اعظم کا کہنا تھا کہ شنگھائی تعاون تنظیم کے حوالے سے بھی میں آپ لوگوں کو مبارکباد دینا چاہتا ہوں کیوں کہ اسلام آباد میں آنے والے غیر ملکی مہمانوں نے اسلام آباد کی خوبصورتی کی بہت تعریف کی، لہذا میں دوبارہ گزارش کروں گا کہ اس شہر کی خوبصورتی میں مزید اضافہ کریں۔