18 Nov 2026
(لاہور نیوز) شہر میں سستے آٹے کی غیر معمولی قلت پیدا ہو گئی، 1100 روپے میں فروخت ہونے والا 10 کلو آٹے کا تھیلا دکانوں سے غائب ہو گیا۔
تفصیلات کے مطابق مارکیٹ میں 10 کلو آٹے کا تھیلا، جس کی قیمت 1100 روپے بتائی جا رہی ہے، دکانوں پر دستیاب نہیں، جبکہ 15 کلو آٹے کا تھیلا 2400 روپے میں فروخت کیا جا رہا ہے اور مارکیٹ میں وافر مقدار میں موجود ہے۔
شہریوں کا کہنا ہے کہ سستا آٹا خریدنے کیلئے دکانوں کے چکر لگانے پڑ رہے ہیں، لیکن 10 کلو والا سستا تھیلا کہیں دستیاب نہیں، مہنگا آٹا تو وافر موجود ہے مگر سستا آٹا نہیں مل رہا۔
شہریوں نے حکومت سے مطالبہ کیا ہے کہ مارکیٹ میں سستے آٹے کی فراہمی یقینی بنائی جائے تاکہ عام آدمی کو مناسب قیمت پر آٹا میسر آسکے اور انہیں سستے آٹے کے حصول کیلئے خوار نہ ہونا پڑے۔
