(لاہور نیوز) سوئی ناردرن گیس کمپنی نے بھگیوال، باغبانپورہ کے علاقے میں نئی گیس پائپ لائن بچھا دی، جس سے علاقہ مکینوں کا دیرینہ مسئلہ حل ہو گیا۔
تفصیلات کے مطابق علاقے میں گیس پائپ لائن کے مسئلے کے باعث 100 سے زائد گھروں کے گیس کنکشن منقطع کر دیئے گئے تھے، جس سے شہریوں کو شدید مشکلات کا سامنا تھا، لاہور نیوز نے اہل علاقہ کی آواز اعلیٰ حکام تک پہنچائی، جس کے بعد سوئی ناردرن نے بحالی کیلئے ہنگامی اقدامات کئے۔
جنرل منیجر لاہور ریجن ایسٹ کے مطابق گیس کی بحالی کا کام ہنگامی بنیادوں پر مکمل کر لیا گیا ہے، جبکہ نئی بچھائی گئی گیس پائپ لائن کو بھی آپریشنل کر دیا گیا ہے۔
سوئی ناردرن حکام کا کہنا ہے کہ متاثرہ گھروں کے گھریلو گیس کنکشنز کو نئی پائپ لائن پر منتقل کرنے کا عمل بھی جاری ہے تاکہ تمام صارفین کو گیس کی فراہمی بحال کی جا سکے۔
نئی گیس پائپ لائن فعال ہونے کے بعد علاقہ مکینوں نے دیرینہ مسئلہ حل ہونے پر اطمینان کا اظہار کیا ہے۔
