(ویب ڈیسک) اوپن مارکیٹ میں سبز مصالحہ جات، سبزیوں اور پھلوں کی قیمتوں میں مسلسل اضافہ دیکھنے میں آ رہا ہے جبکہ کئی اشیاء سرکاری نرخوں سے کہیں زیادہ قیمت پر فروخت کی جا رہی ہیں۔

مارکیٹ سروے کے مطابق لیموں کی سرکاری قیمت 260 روپے فی کلو مقرر ہے تاہم بازار میں یہ 700 روپے فی کلو تک فروخت ہو رہا ہے، اسی طرح چائینہ لہسن کی سرکاری قیمت 380 روپے کے مقابلے میں 500 روپے تک وصول کئے جا رہے ہیں جبکہ تھائی لینڈ ادرک 260 روپے کی بجائے 400 روپے فی کلو میں فروخت ہو رہی ہے۔

ٹماٹر کی سرکاری قیمت 40 روپے فی کلو ہے مگر مارکیٹ میں 50 روپے تک فروخت کیا جا رہا ہے، جبکہ آلو درجہ اول 20 روپے کے بجائے 40 روپے فی کلو دستیاب ہیں، کریلا 100 روپے فی کلو میں فروخت ہو رہا ہے۔

شملہ مرچ کی سرکاری قیمت 70 روپے مقرر ہونے کے باوجود 100 روپے فی کلو فروخت کی جا رہی ہے جبکہ سبز مرچ 90 روپے کے بجائے 120 روپے فی کلو دستیاب ہے، بند گوبھی 45 روپے کے بجائے 80 روپے جبکہ پھول گوبھی 120 روپے کے مقابلے میں 150 روپے فی کلو فروخت ہو رہی ہے۔

پھلوں کی قیمتوں میں بھی اضافہ ریکارڈ کیا گیا ہے، تربوز کی سرکاری قیمت 40 روپے فی کلو ہے مگر بازار میں 60 روپے میں فروخت کیا جا رہا ہے، سفید خوبانی 240 روپے کے بجائے 290 روپے تک دستیاب ہے جبکہ خربوزہ 60 روپے کے مقابلے میں 90 روپے فی کلو فروخت ہو رہا ہے۔

اسی طرح فالسہ کی سرکاری قیمت 230 روپے فی کلو مقرر ہے مگر مارکیٹ میں 260 روپے تک فروخت کیا جا رہا ہے، سیب 270 روپے کے بجائے 300 روپے تک دستیاب ہیں جبکہ درجہ اول کیلا 215 روپے درجن کے بجائے 240 روپے درجن میں فروخت ہو رہا ہے۔

شہریوں نے انتظامیہ سے مطالبہ کیا ہے کہ سرکاری نرخوں پر عملدرآمد یقینی بنایا جائے تاکہ مہنگائی کے بوجھ میں کمی لائی جا سکے۔

Subscribe Lahore News on YouTube

Install our App