
(لاہور نیوز) پی ٹی آئی کی 8 فروری کو لاہور مینار پاکستان میں جلسے کیلئے لاہور ہائیکورٹ میں دائر درخواست سماعت کے لیے مقرر ہو گئی۔
جسٹس فاروق حیدر 04 فروری کو پی ٹی آئی چیف آرگنائزر پنجاب عالیہ حمزہ کی درخواست پر سماعت کریں گے۔
درخواست گزار کا موقف ہے کہ 8 فروری کو مینار پاکستان میں جلسے کی اجازت کیلئے ڈی سی لاہور کو درخواست دی، 29 جنوری کو درخواست دائر کی گئی مگر تاحال ڈی سی آفس میں کوئی بھی شنوائی نہیں ہوئی۔
درخواست میں کہا گیا کہ پی ٹی آئی جب بھی جلسے کی اجازت مانگتی ہے تو امن و امان کا مسئلہ بنا لیا جاتا ہے، درخواست گزار کو ہراساں کیا جا رہا ہے اور درخواست واپس لینے کیلئے بھی دھمکیاں دی جا رہی ہیں۔
عدالت سے استدعا ہے کہ ڈپٹی کمشنر لاہور سمیت دیگر کو ہدایت کی جائے کہ 8 فروری کو مینار پاکستان پر جلسے کی اجازت دیں اور پی ٹی آئی کے بے گناہ کارکنوں کو ہراساں اور اغوا کرنے سے بھی روکا جائے۔