(لاہور نیوز) نگران وزیراعلیٰ پنجاب محسن نقوی نے گوجرانوالہ موٹروے لنک روڈ کا دورہ کیا اور تعمیراتی کاموں کا معائنہ کیا۔

وزیراعلیٰ محسن نقوی نے صوبائی  کابینہ کے ہمراہ فلیگ شپ پراجیکٹ ایکسپریس وےموٹر وےلنک روڈ کا تفصیلی دورہ کیا اور مختلف مقامات پر منصوبے کے تعمیراتی کاموں کا جائزہ لیا، وزیراعلیٰ نے اسفالٹ کے جاری کام کا مشاہدہ کیا اور مزدوروں سے مصافحہ کیا۔

محسن نقوی نے محنت سے کام کرنے پر مزدوروں کو شاباش دی اور لاہور،سیالکوٹ موٹروے کے ساتھ گوجرانوالہ کو لنک کرنے کے لئے زیر تعمیر دو رویہ سڑک کے پراجیکٹ پر پیشرفت کا جائزہ لیا، وزیراعلیٰ نے 15.2 کلومیٹر طویل دو رویہ کیرج وے کی جاری تعمیراتی سرگرمیوں کا مشاہدہ کیا۔

ایف ڈبلیو او حکام نے وزیر اعلیٰ کو پراجیکٹ پر ہونے والی پیشرفت کے بارے میں بریفنگ دیتے ہوئے بتایا کہ  پراجیکٹ کا 65 فیصد کام اور 15.2کلو میٹر طویل لنک روڈ کاتقریباً 100فیصد ارتھ ورک مکمل ہو چکا ہے جبکہ روڈز کے اسفالٹ کا کام شروع ہے۔

بریفنگ میں مزید بتایا گیا کہ بینظیر چوک سے واہنڈو انٹر چینج تک زیر تعمیر روڈ پر 6پل، 22باکس،23پائپ کلورٹس،5جانوروں کی گزر گاہیں اور 5سب ویز بھی تعمیر کئے جارہے ہیں۔

وزیراعلیٰ محسن نقوی نے پراجیکٹ پر ہونے والی پیشرفت پر اطمینان کا اظہار کیا اور ایف ڈبلیو او اور کمشنر گوجرانوالہ کی ٹیم کی کارکردگی کو سراہا، نگران وزیراعلیٰ نے منصوبے پر کام کی رفتار مزید تیز کرنے اور اعلیٰ تعمیراتی معیار کو یقینی بنانے کی ہدایت کی، محسن نقوی نے کیرج وے کے دونوں اطراف باڑ لگانے کی بجائے حفاظتی دیوار بنانے کی ہدایت کی۔

اس موقع پر گفتگو کرتے ہوئے وزیراعلیٰ محسن نقوی نے کہا کہ گوجرانوالہ لاہور سیالکوٹ موٹروے کے منصوبہ کو مقررہ ٹائم لائن کے اندر مکمل کیا جائے گا، منصوبے کی تکمیل سے وقت کے ساتھ ایندھن کی مد میں خاطر خواہ بچت ہو گی۔

انہوں نے مزید کہا کہ منصوبے کی تکمیل سے گوجرانوالہ سے لاہور کا سفر 45 منٹ کا رہ جائے گا، 15.2 کلو میٹر طویل دو رویہ کارپٹڈ سڑک موٹر وے کے لئے بہترین رسائی فراہم کرے گی۔

Follow Lahore News on Facebook

Install our App