(لاہور نیوز) غیرقانونی طور پر مقیم افغان باشندوں کے انخلاء کی مہم کے تحت محکمہ داخلہ پنجاب کے فارن نیشنل سکیورٹی ونگ کی کارروائیاں جاری ہیں، جہاں غیر قانونی طور پر مقیم افغان شہریوں کو گرفتار کرکے وطن واپس بھجوایا جا رہا ہے۔

محکمہ داخلہ پنجاب کے مطابق اب تک پاکستان سے مجموعی طور پر 28 لاکھ 7 ہزار 250 افغان باشندوں کو واپس بھجوایا جا چکا ہے، جبکہ پنجاب سے ایک لاکھ 43 ہزار 474 غیر قانونی طور پر مقیم افغان باشندوں کی واپسی عمل میں لائی گئی ہے۔

حکومت پاکستان کی پالیسی کے مطابق قابل قبول ویزا کے بغیر افغان شہریوں کا پاکستان میں قیام غیر قانونی تصور کیا جاتا ہے، غیر قانونی طور پر مقیم افغان شہریوں کو گرفتار کرکے ہولڈنگ سینٹرز منتقل کیا جاتا ہے، جہاں ان کی عارضی رہائش، رجسٹریشن اور وطن واپسی کے انتظامات کیے جاتے ہیں۔

محکمہ داخلہ کے مطابق پنجاب بھر میں اس وقت 39 ہولڈنگ سینٹرز فعال ہیں، جن میں 153 افغان شہری موجود ہیں، قانونی کارروائی اور ضروری انتظامات مکمل ہونے کے بعد ان افراد کو طورخم بارڈر پر افغان حکام کے حوالے کیا جاتا ہے۔

غیر قانونی طور پر مقیم افغان باشندوں کے خلاف کریک ڈاؤن کے دوران صوبہ بھر کے رہائشی علاقوں اور مارکیٹس میں 4 لاکھ سے زائد سرچ آپریشنز کیے گئے، جبکہ غیر قانونی طور پر مقیم افغان شہریوں کو جائیدادیں کرائے پر دینے والے 803 افراد کے خلاف مقدمات بھی درج کیے گئے ہیں۔

محکمہ داخلہ پنجاب کے مطابق یہ اعداد و شمار حکومت پنجاب کی حکمت عملی اور انتظامی اقدامات کی عکاسی کرتے ہیں، افغان شہریوں کی واپسی کے قومی مشن میں عوام کا تعاون بھی ضروری ہے۔

شہریوں سے اپیل کی گئی ہے کہ افغان شہریوں کے غیر قانونی قیام، شناختی دستاویزات میں جعلسازی یا کسی بھی مشکوک سرگرمی سے متعلق اطلاع ایمرجنسی ہیلپ لائن 15 پر دیں، حکام کے مطابق اطلاع دینے والوں کی شناخت صیغہ راز میں رکھی جاتی ہے۔

Subscribe Lahore News on YouTube

Install our App