(لاہور نیوز) پاکستان سپر لیگ کے اہم میچ میں آج اسلام آباد یونائیٹڈ اور حیدرآباد کنگز قذافی سٹیڈیم لاہور میں مدمقابل ہوں گے، جس کے پیش نظر لاہور ٹریفک پولیس نے شہر بھر کے لیے خصوصی ٹریفک انتظامات مکمل کر لیے ہیں۔
سی ٹی او لاہور کے مطابق میچ کے دوران ٹریفک کی روانی برقرار رکھنے کے لیے تقریباً 600 ٹریفک اہلکار ڈیوٹی انجام دیں گے، جبکہ 11 فورک لفٹرز اور 3 بریک ڈاؤن گاڑیاں بھی ہنگامی صورتحال سے نمٹنے کے لیے ہر وقت تیار رہیں گی۔
ٹریفک پولیس نے شائقین کرکٹ کے لیے مختلف مقامات پر پارکنگ پلان بھی جاری کیا ہے۔ ڈیفینس سے آنے والے افراد کے لیے CBD پارکنگ، فیروزپور روڈ سے آنے والوں کے لیے گلبرگ کالج پارکنگ، جبکہ کینٹ اور دیگر علاقوں سے آنے والوں کے لیے لبرٹی اور سن فورٹ ہوٹل کے اطراف پارکنگ مختص کی گئی ہے۔
حکام کا کہنا ہے کہ شہر کی اہم شاہراہیں جن میں مال روڈ، جیل روڈ، کینال روڈ، فیروزپور روڈ اور مین بلیوارڈ گلبرگ شامل ہیں، ٹریفک کے لیے کھلی رہیں گی اور کسی بھی سڑک کو مستقل طور پر بند نہیں کیا جائے گا۔
سی ٹی او لاہور نے شہریوں کو ہدایت کی ہے کہ وہ رانگ پارکنگ سے گریز کریں اور صرف مقررہ پارکنگ سٹینڈز کا استعمال کریں۔ مزید برآں شہریوں کو ٹریفک کی تازہ صورتحال سے آگاہ رکھنے کے لیے راستہ ایپ اور ایف ایم 88.6 پر مسلسل اپڈیٹس فراہم کی جائیں گی۔
