(لاہور نیوز) تجاوزات مافیا کے خلاف بننے والی حکمت عملی ناکام ہو گئی، چار ماہ گزر گئے مگر تجاوزات کرنے والوں کو ایک روپیہ بھی جرمانہ نہ کیا گیا۔

رواں سال کے آغاز میں گورننگ باڈی نے تجاوزات مافیا کے خلاف جرمانے عائد کرنے کی نئی حکمت عملی بنائی، چار ماہ گزر گئے مگر کسی کو ایک روپیہ بھی جرمانہ نہیں کیا گیا، چار ماہ کے دوران کئے جانے والے تمام آپریشنز کے اخراجات بھی ایل ڈی اے نے خود برداشت کئے۔

ایل ڈی اے کے شعبہ ٹاؤن پلاننگ کو املاک سربمہر کرنے اور ایف آئی آر درج کروانے کی اجازت ہے، جرمانے عائد کرنے کے لئے ایل ڈی اے قوانین میں بھی ترمیم کی گئی، غیر قانونی املاک اور کمرشل سرگرمیاں کرنے پر پراپرٹی فائلز بند اور یوٹیلیٹیز منقطع کی جانی تھیں تاہم چار ماہ کے دوران کسی بھی پراپرٹی کا یوٹیلیٹی کنکشن بھی منقطع نہ کیا گیا۔

ایل ڈی اے کنٹرولڈ ایریا میں واقع املاک کو چار مختلف کیٹیگریز میں جرمانے کئے جانے تھے، ایل ڈی اے گورننگ باڈی نے بلڈنگ ریگولیشنز میں ترمیم کی منظوری بھی دی، غیر قانونی لینڈ یوز کنورژن کرنے پر نیا قانون نافذ کیا گیا، گھریلو اور سیمی کمرشل پلاٹس پر کمرشل سرگرمیاں کرنے والوں کے خلاف کارروائیاں کی جانی تھیں، غیر قانونی لینڈ یوز کنورژن کرنے پر پانچ مرلہ عمارت سربمہر اور ڈی سی ریٹ کا ایک فیصد جرمانہ عائد کیا جانا تھا، دیگر غیر قانونی لینڈ سب ڈویژنز پر بھی جرمانے کا قانون بنایا گیا لیکن ایل ڈی اے کا شعبہ ٹاؤن پلاننگ کارروائی کرنے کے بجائے خاموش ہو گیا۔

ایل ڈی اے انتظامیہ کا کہنا ہے کہ متعلقہ افسران کو یوٹیلیٹیز منقطع کرنے اور جرمانے کرنے کے احکام صادر کر دیئے ہیں۔

Follow Lahore News on Facebook

Install our App