(لاہور نیوز) وزیراعلیٰ پنجاب مریم نواز شریف کی ہدایت پر محکمہ داخلہ میں ڈائریکٹوریٹ آف مانیٹرنگ سیل قائم کر دیا گیا۔

محکمہ جیل، سول ڈیفنس، ہائی وے پٹرول اور سکیورٹی کمپنیز سے متعلق شکایت کے ازالے کیلئے خصوصی ہیلپ لائن1124 قائم کر دی گئی۔ عوام محکمہ جیل، شہری دفاع، ہائی وے پٹرول اور سکیورٹی کمپنی سے متعلق رہنمائی یا شکایت کی صورت میں 1124 پر کال کر سکتے ہیں۔

کسی جگہ پر بم یا مشکوک اشیاء نظر آنے پر ہیلپ لائن 1124 پر اطلاع کی سہولت بھی میسر ہوگی۔ پنجاب کی بڑی شاہراوں پر دوران سفر مدد یا رہنمائی کے لئے پنجاب ہائی وے پٹرول سے رابطہ کا سسٹم قائم ہو گیا ہے۔

مسافر گاڑی کی خرابی، ڈکیتی یا کسی بھی ہنگامی صورت میں مدد کے لئے 1124 کال کر سکتے ہیں۔ پبلک ٹرانسپورٹ پر اوورلوڈنگ اورغیر محتاط ڈرائیونگ کے بارے 1124 پر اطلاع دیئے جانے پر فوری کارروائی ہوگی۔

پنجاب کی کسی بھی شاہراہ پر سفر کے دوران مسافر طبی امداد کے لئے بھی ہیلپ لائن پر کال کر سکتے ہیں۔ ہیلپ لائن پر کال کی صورت میں ہائی وے پٹرولنگ سٹاف کے نامناسب رویہ کا بھی ازالہ کیا جائے گا۔ 1124 پر قیدیوں سے ملاقات یا ضروری سامان کی فراہمی میں دشواری کی صورت میں شکایت کا اندراج ممکن ہوگا۔ جیل کے عملہ کے نامناسب رویے اور رشوت طلب کرنے پربھی 1124 پر شکایت کی جا سکتی ہے۔

سکیورٹی گارڈز یا سکیورٹی کمپنیز سے متعلق ہیلپ لائن پر شکایات کا ازالہ فوری ممکن ہوگا۔ سکیورٹی گارڈز کومقررہ اجرت سے کم تنخواہ ملنے کی شکایت پر سکیورٹی کمپنی کے خلاف بھی کارروائی ہوگی۔

ایل پی جی کی غیر قانونی فروخت یا منتقلی پر بھی ہیلپ لائن 1124 پر شکایت کا ازالہ ہوگا۔ ملٹی سٹوریج بلڈنگ میں ایمرجنسی اخراج کا نظام نہ ہونے پر بھی ہیلپ لائن پر اطلاع دی جا سکتی ہے۔ پٹرول پمپ یا گیس سٹیشن پر آگ بجھانے کے ضروری انتظامات نہ ہونے پر محکمہ داخلہ کی ہیلپ لائن پر رابطہ کیا جا سکتا ہے۔

وزیراعلیٰ مریم نواز شریف کا کہنا ہے کہ شہریوں کے لئے آسانیاں پیدا کرنا ہمارا عزم ہے،عوام کی جان و مال کی حفاظت اور خدمت کے لئے میں اور میری ٹیم پرعزم ہیں،عوامی شکایات کے ازالے میں کوتاہی برادشت نہیں کی جائے گی، پنجاب کی شاہراؤں پر محفوظ سفر یقینی بنانے کے لئے ہائی وے پٹرول کو نئے سرے سے فعال کیا جارہا ہے، قیدیوں کے قانونی حقوق کا تحفظ یقینی بنائیں گے۔ 

Follow Lahore News on X

Install our App