(لاہور نیوز) وزیراعلیٰ پنجاب مریم نواز نے زرعی ٹیوب ویلز کی سولرائزیشن کے منصوبے کا افتتاح کر دیا۔

وزیراعلیٰ مریم نواز  نے زرعی ٹیوب ویلز کی سولرائزیشن کے منصوبے کیلئے قرعہ اندازی کی، زرعی ٹیوب ویلز کی سولرائزیشن کے منصوبے کی قرعہ اندازی میں سب سے پہلے نام اٹک کے محمد نواز کا نکلا، وزیراعلیٰ پنجاب نے ضلع نارووال کے خوش نصیب کاشتکاروں کی لسٹ بھی چیک کی۔

منصوبے کے تحت قرعہ اندازی کے ذریعے پہلے فیز میں پنجاب بھر میں 8 ہزار ٹیوب ویلز شمسی توانائی پر منتقل کئے جائیں گے ، عام کاشت کار کو سولر ٹیوب ویل سے روزانہ اوسط دس ہزار سے زائد اور ماہانہ سوا تین لاکھ سے زیادہ کی بچت ہو گی۔

حکومت پنجاب زرعی ٹیوب ویلز کیلئے 10 کلو واٹ کے سولر سسٹم کیلئے 5 لاکھ روپے سبسڈی دے گی، 15 کلوواٹ سولر سسٹم کیلئے ساڑھے 7 لاکھ اور 20 کلو واٹ سولر سسٹم کیلئے 10 لاکھ روپے کی سبسڈی دی جائے گی۔

قرعہ اندازی میں کامیاب کاشتکار متعلقہ ضلع کے وینڈر کا انتخاب کر کے سولر سسٹم کی تنصیب کرائیں گے ، پنجاب میں چیف منسٹر زرعی ٹیوب ویلز سولرائزیشن پراجیکٹ کیلئے 5 لاکھ 30 ہزار سے زائد کاشتکاروں  نے اپلائی کیا جن میں سے 3 لاکھ 85 ہزار کاشتکار قرعہ اندازی کے اہل قرار پائے۔

وزیراعلیٰ مریم نواز  نے پہلے فیز میں زرعی ٹیوب ویلز کی سولرائزیشن جون تک مکمل کرنے کا ہدف مقرر کر دیا، 87 فیصد ڈیزل پر چلنے والے زرعی ٹیوب ویلز اور 13 فیصد بجلی سے چلنے والے زرعی ٹیوب ویلز شمسی توانائی پر منتقل ہوں گے۔

اس حوالے سے وزیراعلیٰ پنجاب مریم نواز  نے کہا کہ زرعی ٹیوب ویلز کی سولرائزیشن کا منصوبہ کاشتکاری میں انقلاب لائے گا، زرعی ٹیوب ویلز کی سولرائزیشن سے فصل کی پیداواری لاگت میں نمایاں کمی آئے گی اور کاشتکار خوشحال ہو گا، کسان کارڈ، ایگریکلچرمیکائزیشن اور ایگری انٹرن شپ سمیت ہر پراجیکٹ کاشتکار کیلئے آسانیاں اور بہتری لا رہا ہے۔

Subscribe Lahore News on YouTube

Install our App