![](/lahorenewsimages/77992_30581518.jpg)
(لاہور نیوز) نگران وزیراعلیٰ پنجاب محسن نقوی کا کہنا ہے لاہور چڑیا گھر میں 100 نئے جانور لائے جائیں گے۔
شہریوں کو تفریح کی معیاری سہولتیں فراہم کرنے کا شاندار پلان بنا لیا گیا۔ لاہور چڑیا گھر اپ گریڈ ہو گا۔ وزیراعلیٰ پنجاب محسن نقوی نے سنگ بنیاد رکھ دیا۔ وزیراعلیٰ نے اپ گریڈیشن کے بعد چڑیا گھر میں فیملی ، سمر اور دیگر پیکجز متعارف کرانے کی ہدایت کر دی۔
محسن نقوی نے شیر، بندر ، زرافہ ہاؤس اور دیگر جانوروں کے پنجروں کا معائنہ کیا۔ نئے ریپٹائل ہاؤس کے بارے میں بریفنگ لی۔ انہوں نے کہا لاہور چڑیا گھر میں 100 نئے جانور لائے جائیں گے، اژدھا اور سانپ کی نئی اقسام بھی لائی جائیں گی، ایکوریم میں 142 اقسام کی سمندری حیات رکھی جائیں گی، لاہور چڑیا گھر کو انٹرنیشنل سٹینڈرڈ کے مطابق اپ گریڈ کیا جائے گا۔ انہوں نے زو اپ گریڈیشن پراجیکٹ کے لئے فنڈز کے فوری اجراء کی ہدایت بھی کر دی۔