(لاہور نیوز) قومی و صوبائی حلقوں میں آج ضمنی انتخابات کے انعقاد کے موقع پر پنجاب پولیس ہائی الرٹ ہے۔

آئی جی پنجاب ڈاکٹرعثمان انور کا اس حوالے سے کہنا ہے کہ قومی و صوبائی حلقوں پر ہونے والے ضمنی انتخابات کی سکیورٹی پر 20 ہزار سے زائد پولیس افسران و اہلکار تعینات ہیں، ضمنی انتخابات کے محفوظ انعقاد، ووٹرز کو حق رائے دہی کے لئے پرامن ماحول فراہم کریں گے۔

ڈاکٹر عثمان انور نے کہا کہ الیکشن کمیشن کے ضابطہ اخلاق، دفعہ 144، اسلحہ پابندی کی خلاف ورزی پر زیرو ٹالرنس ہے، 939مردانہ، 889 زنانہ، 964 جوائنٹ پولنگ سٹیشنز پر ووٹرز اور الیکشن  کمیشن عملے کو بھرپور سکیورٹی فراہم کر رہے ہیں، 2792 پولنگ سٹیشنز میں سے 408 انتہائی حساس، 1032 حساس قرار دیئے گئے ہیں۔

انہوں نے بتایا کہ پولنگ سٹیشنز پر سی سی ٹی وی کیمروں کی تنصیب مکمل ہے اور لمحہ بہ لمحہ مانیٹرنگ کی جا رہی ہے، سنٹرل پولیس آفس، سیف سٹیز اتھارٹی، اضلاع کے کنٹرول اینڈ مانیٹرنگ رومز سے پولنگ کے عمل کی مسلسل نگرانی کی جا رہی ہے، متعلقہ اداروں کی مشاورت سے الیکشن سکیورٹی، لاجسٹکس، کمیونیکیشن اینڈ ٹرانسپورٹیشن پلان مرتب کیا گیا ہے۔

 آئی جی پنجاب نے کہا کہ دہشت گرد، شر پسند و ملک دشمن عناصر کی امن سبوتاژ کرنے کی تمام بزدلانہ کوششوں کو ناکام بنائیں گے، پنجاب کانسٹیبلری، پی ایچ پی ، ایلیٹ، ایس پی یو اور ٹریننگ برانچ میں تعینات اہلکار الیکشن سکیورٹی ڈیوٹی پر تعینات ہیں۔

انہوں نے کہا کہ لیڈیز پولنگ سٹیشنز اور بوتھ پر خواتین پولیس اہلکار فرائض سر انجام دے رہی ہیں، ضمنی انتخابات کے لئے پنجاب پولیس کو رینجرز اور پاک آرمی کی مکمل معاونت حاصل ہے، ڈولفن سکواڈ ، سپیشل برانچ، سی ٹی ڈی سمیت تمام فارمیشنز کو الیکشن سکیورٹی کیلئے استعمال کیا جا رہا ہے۔

Follow Lahore News on Facebook

Install our App