16 Aug 2025
(لاہور نیوز) پنجاب فوڈ اتھارٹی نے خوراک کے معیار پر سمجھوتہ کرنے والی فیکٹریوں کے خلاف سخت کارروائی کرتے ہوئے تین فوڈ انڈسٹریز کو مجموعی طور پر 10 لاکھ روپے کے جرمانے کر دیئے۔
ڈی جی فوڈ اتھارٹی عاصم جاوید کی نگرانی میں کئے گئے چیکنگ آپریشن کے دوران ناقص صفائی اور حفظانِ صحت کے اصولوں کی سنگین خلاف ورزیوں کا انکشاف ہوا، سٹوریج اور پروسیسنگ ایریا میں مکھیاں، چھپکلیاں، چوہے اور فنگس زدہ دیواریں پائی گئیں جو خوراک کی تیاری کے کسی بھی معیار پر پورا نہیں اترتیں۔
کارروائی کے دوران دو من سے زائد ناقص شہد، ملاوٹ شدہ مصالحہ جات اور مضر صحت کیمیکلز کو تلف کر دیا گیا۔
ڈی جی فوڈ اتھارٹی کا کہنا تھا کہ صارفین کی صحت کے ساتھ کوئی سمجھوتہ نہیں کیا جائے گا اور ناقص اشیا فروخت کرنے والوں کے خلاف بلا تفریق کارروائیاں جاری رہیں گی۔
