(ویب ڈیسک) پاکستان ہاکی ٹیم کے کپتان عماد بٹ نے کہا ہے کہ ہاکی باتوں سے ٹھیک نہیں ہوگی ہمیں سہولیات دی جائیں، فیڈریشن نے ابھی تک ہمارے واجبات ادا نہیں کیے ہیں۔

لاہور میں میڈیا سےگفتگو میں قومی ہاکی ٹیم کےکپتان عماد بٹ کا کہنا تھا کہ ایشیا کپ کے لیے خود کو تیار کررہے ہیں اس وقت تیاری بڑی اچھی ہے، ہمارے لیے ایشیا کپ بڑا اہم ٹورنامنٹ ہے، ایشیا کپ ورلڈکپ کا کوالیفائنگ راؤنڈ بھی ہے۔

عماد بٹ کا کہنا تھا کہ ایشیا کپ میں شرکت کے حوالے سے فیڈریشن نے حکومت سے بات کی ہے، جو فیصلہ ہوگا اسی پرعمل کریں گے، میں سمجھتا ہوں کہ اس وقت بھارت جانا ہمارے لیے خطرے سے خالی نہیں۔

کپتان قومی ہاکی ٹیم کا کہنا تھا کہ فیڈریشن نے ابھی تک ہمارے واجبات ادا نہیں کیے ہیں، جو کمٹمنٹ ہواس کو پورا کیا جانا چاہیے، جو میری آڈیو لیک ہوئی ہے اس پرغور و فکر کرنا چاہیے، میں سمجھتا ہوں کہ فیڈریشن کے پاس ابھی بجٹ نہیں ہے۔

پاکستان ہاکی ٹیم کے کپتان کا کہنا تھا کہ ہمارے پاس ایسا بیک اپ موجود ہے کہ ہم کسی بھی ٹیم کو ہرا سکتے ہیں، ہماری سہولیات کو بہتر کرنا چاہیے، فیڈریشن کو اپنے وعدے پورے کرنے چاہئیں، وزیراعظم سے درخواست کی تھی کہ ڈیپارٹمنٹس کی ٹیمیں بحال کر دیں تاکہ کھلاڑیوں کو روزگار ملے۔

ان کا کہنا تھا کہ کھلاڑیوں کی بغاوت کے حوالے سے باتیں سننے کو مل رہی ہیں، ابھی ایسی کوئی بات مکمل نہیں ہے جب اس بارے میں فیصلہ ہوگا تو پتہ چل جائےگا، اس حوالے سے جو بھی ہوگا میڈیا کو بتائیں گے، ابھی تک فیڈریشن نے کوئی میسج نہیں بھیجا اور نہ ہی کوئی بات ہوئی نہ کسی سے رابطہ ہے، ہاکی باتوں سے ٹھیک نہیں ہوگی، ہمیں سہولیات دی جائیں۔

عماد بٹ کا کہنا تھا آڈیو میں جو باتیں میں نے کی ہیں ان پر قائم ہوں،کھلاڑیوں کے ساتھ کی گئی کمٹمنٹس کو پورا کیا جائے، آڈیو میں جو کہا ہے بالکل درست کہا ہے اور ویسا ہی ہوسکتا ہے، اگر ضرورت پڑی تو دوبارہ بھی ایسی بات کروں گا۔

Subscribe Lahore News on YouTube

Install our App