(لاہور نیوز) صوبائی دارالحکومت کے شہر لاہور میں خودکشی کے واقعات میں روز بروز اضافہ ہونے لگا، گزشتہ ماہ مئی میں دو خواتین اور کسٹمر آفیسر سمیت 15 افراد نے خودکشی کر کے اپنی زندگی کا خاتمہ کر لیا۔

پولیس کے مطابق لاہور میں ماہ مئی کے دوران مختلف وجوہات پر 15 افراد نے خودکشی کی، مختلف علاقوں میں خودکشی کرنے والوں میں 2 خواتین اور 13 مرد شامل ہیں۔

2 مئی کو برکی کے علاقہ پیراگون سٹی میں 40 سالہ امداد حسین نے خود کو گولی مار کر خودکشی کی جبکہ کاہنہ میں 22 سالہ آفتاب میو نے گندم میں رکھنے والی گولیاں کھا کر اپنی جان لے لی،  5 مئی کو جعفریہ کالونی شیراکوٹ میں 38 سالہ رضا عباس  نے سر میں گولی مار کر اپنی جان گنوائی جبکہ  6 مئی کو ہربنس پورہ پیر نصیر روڈ پر 30 سالہ عمر نے اپنے سینے میں گولی مار کر زندگی کا خاتمہ کر ڈالا۔

13 مئی کو سندر میں سابق کسٹم آفیسر عثمان نے اپنی اہلیہ عائشہ کو زخمی کرنے کے بعد سر میں گولی مار کر خودکشی کی، 16 مئی کو گلستان کالونی باغبانپورہ میں 40 سالہ عبدالغفار  نے گندم میں رکھنے والی گولیاں نگل کر اپنی جان لے لی۔

18 مئی کو شاہدرہ کی چوکی سگیاں کے علاقہ میں 35 سالہ نجمہ بی بی نے خود سوزی کی، 18 مئی کو اعوان مارکیٹ نشتر کالونی میں 21 سالہ عادل نے گلے میں پھندا ڈال کر اپنی جان گنوائی جبکہ 19 مئی کو باٹا پور میں نعمان نامی نوجوان نے 24 سالہ نمرہ کو زخمی کرنے کے بعد اپنے سر میں گولی مار کر خودکشی کر لی۔

20 مئی کو یوسف نگر شیراکوٹ میں 24 سالہ سفیان منظور  نے زہریلی گولیاں کھا کر اپنی زندگی کا خاتمہ کر ڈالا، 21 مئی کو گجرپورہ چائنہ سکیم میں 32 سالہ زوہیب علی نے آرے میں گردن دے کر خودکشی کی، پولیس کے مطابق متوفی آئس کے نشے کا عادی اور تین بچوں کا باپ تھا۔

26 مئی کو اچھرہ کے علاقہ چاہ جموں والا بازار میں 20 سالہ علی رضا نے گلے میں پھندا ڈال کر خودکشی کی،  27 مئی کو گلبرگ میں 37 سالہ حسن مقصود نے اپنے سر میں گولی مار کر زندگی کا خاتمہ کیا،  30 مئی کو ساندہ افضال روڈ پر 22 سالہ وسیم نے گلے میں پھندا ڈال کر خودکشی کی اور 31 مئی 2025 کو سندر کے علاقہ میں 22 سالہ مریم  نے زہریلی گولیاں کھا کر اپنی زندگی کا خاتمہ کر ڈالا۔

واضح رہے کہ پولیس کے مطابق خودکشی کے واقعات میں گھریلو تنازعات اور ذاتی نوعیت کے محرکات بھی سر فہرست ہیں۔

Follow Lahore News on X

Install our App