لاہور (مدثر حسین) چاند رات اور عید الفطر کی آمد کے حوالے سے وزیراعلیٰ پنجاب مریم نواز کی ہدایت پر پنجاب پولیس نے سکیورٹی انتظامات مکمل کر لیے۔

ترجمان پنجاب پولیس کے مطابق چاند رات اور عیدالفطر پر لاہور سمیت صوبہ کے تمام اضلاع میں 52 ہزار سے زائد افسران و اہلکار تعینات ہونگے، صوبہ بھر میں 26 ہزار سے زائد مساجد، امام بارگاہوں اور کھلے مقامات پر نماز عید الفطر کیلئے سکیورٹی انتظامات مکمل ہیں۔

ترجمان نے بتایا ہے کہ صوبائی دارالحکومت میں چاند رات اور عید الفطر پر 08 ہزار سے زائد افسران اور اہلکار سکیورٹی ڈیوٹی کریں گے، صوبہ بھر میں  8 ہزار سے زائد سی سی ٹی وی کیمرے، 15ہزار سے زائد میٹل ڈیٹیکٹرز اور 168 واک تھرو گیٹس استعمال کئے جائیں گے، سیف سٹیز اتھارٹی کے کنٹرول رومز سے مساجد، امام بارگاہوں اور حساس مقامات کی نگرانی کی جائے گی۔

آئی جی پنجاب ڈاکٹر عثمان انور نے کہا ہے کہ چاند رات اور عید پر ڈولفن سکواڈ، پی آر یو، ایلیٹ ٹیمیں اہم مقامات کے گرد مسلسل پٹرولنگ کریں گی، ہوائی فائرنگ، ون ویلنگ اور ہلڑ بازی کی ہرگز اجازت نہیں، خواتین کو ہراساں کرنے والے اوباشوں کو جیل کی ہوا کھانا پڑے گی۔

ڈاکٹر عثمان انور کا کہنا تھا کہ آر پی اوز اور ڈی پی اوز عید سکیورٹی انتظامات کی خود نگرانی کریں، ملکی حالات کے پیش نظر بین الصوبائی راستوں پر گاڑیوں اور افراد کی چیکنگ اور دریائی چیک پوسٹوں پر پٹرولنگ کو مزید مؤثر بنایا جائے۔

انہوں نے مزید کہا کہ مری اور گلیات میں عید کی چھٹیوں میں اضافی رش کے پیش نظر ٹورازم فورس سیاحوں کو سہولت، تحفظ اور رہنمائی فراہم کرے، اہم شاہرات اور تفریحی مقامات کے گردونواح میں ٹریفک کی روانی برقرار رکھنے کے لیے اضافی نفری تعینات کی جائے۔

Follow Lahore News on Twitter

Install our App