(لاہور نیوز) نیشنل ہائی ویز اور موٹرویز پر جرمانوں کی شرح میں اضافہ کر دیا گیا۔

ٹریفک قوانین کی خلاف ورزیوں کے 32 کوڈ کے جرمانوں کی شرح مقرر کی گئی ہے، ریوائزڈ جرمانوں کی شرح شیڈول 12 کے تحت عمل میں لائی گئی ہے جس میں 7 نئی ٹریفک خلاف ورزیوں کے کوڈ بھی شامل کیے گئے ہیں۔

موٹر وے پولیس حکام کے مطابق نئی شرح کے تحت جرمانوں کا اطلاق یکم اکتوبر سے ہو گا، اوور سپیڈنگ پر اب 750 روپے کے بجائے 2500 روپے جرمانہ ہو گا، غلط اوور ٹیکنگ پر 300 روپے کے بجائے 1500 روپے جرمانہ ہو گا۔

مراسلے کے مطابق بغیر لائسنس گاڑی چلانے پر 750 روپے کے بجائے اب 5000 روپے جرمانہ عائد ہو گا، ایمرجنسی سروس وہیکل و ایمبولنس کو راستہ نہ دینے پر 1 ہزار روپے جرمانہ عائد ہو گا، غفلت سے ڈرائیونگ کرنے پر جرمانے کی شرح 3 سو کے بجائے 1500 جرمانہ ہو گا۔

ٹریفک کوڈ میں پہلی دفعہ دوران ڈرائیونگ، موبائل فون ٹیبلیٹ یا دیگر الیکٹرانک ڈیوائس کے استعمال پر بھی پابندی کی خلاف ورزی پر 5 سو روپے جرمانہ عائد ہو گا، دوران ڈرائیونگ اور دوران سفر ڈرائیور و سوار کے لیے سیٹ بیلٹ بھی لازمی قرار دی گئی ہے جس کی خلاف ورزی پر 15 سو روپے جرمانہ ہو گا ۔

گاڑی پر غیرقانونی پولیس یا دیگر محکمے کی ریوالونگ لائٹ پر 5 ہزار روپے جرمانہ عائد ہو گا، فینسی نمبر پلیٹ یا ان مشین ریڈ ایبل پلیٹ پر ایک ہزار روپے جرمانہ ہو گا، ایچ آئی ڈی لائٹ کے استعمال پر دو ہزار روپے جرمانہ عائد ہو گا، شیشے کالے کرکے ڈرائیونگ پر بھی ایک ہزار روپے جرمانہ مقرر کر دیا گیا ہے۔

آئی جی نیشنل ہائی وے اینڈ موٹر وے پولیس نے فیلڈ سٹاف کو جرمانوں کی ریوائزڈ شرح کے بارے میں بروشرز اور پمفلٹس کے ذریعے ڈرائیورز کو آگاہی فراہم کرنے کی ہدایات جاری کر دیں۔

Follow Lahore News on Facebook

Install our App