(لاہور نیوز) نیشنل ہائی ویز اینڈ موٹروے پولیس کے سنٹرل ریجن کے ترجمان سید عمران احمد نے کہا ہے کہ عیدالاضحیٰ کے دوران موٹرویز پر جانوروں سے لدی گاڑیوں کے داخلے پر مکمل پابندی عائد کر دی گئی ہے۔
ترجمان کے مطابق یہ فیصلہ عوامی تحفظ اور ٹریفک کی روانی برقرار رکھنے کے لیے کیا گیا ہے۔ انہوں نے کہا کہ اوورلوڈ اور غیر فٹ گاڑیاں سنگین حادثات کا باعث بن سکتی ہیں، جبکہ ماضی میں بھی ایسی گاڑیوں کے سبب موٹرویز پر کئی خطرناک حادثات پیش آ چکے ہیں۔
انہوں نے بتایا کہ جانوروں سے لدی گاڑیوں کو متبادل اور محفوظ راستوں پر منتقل کیا جائے گا۔ اس سلسلے میں پنجاب پولیس اور خیبرپختونخوا پولیس کو داخلی مقامات پر چیک پوسٹس قائم کرنے کی ہدایت جاری کر دی گئی ہے۔
ترجمان کا کہنا تھا کہ مویشی منڈیوں اور انٹرچینجز کے قریب غیر قانونی پارکنگ کے خلاف بھی کارروائی کی جائے گی، جبکہ ٹریفک قوانین اور لوڈنگ معیار کی خلاف ورزی پر سخت قانونی کارروائی عمل میں لائی جائے گی۔
