(لاہور نیوز) کاہنہ کے علاقے میں سی سی ڈی ماڈل ٹاؤن پولیس کے زیر حراست ملزم محمد خالد ایک مبینہ پولیس مقابلے میں اپنے ہی ساتھیوں کی فائرنگ سے ہلاک ہو گیا۔
تفصیلات کے مطابق محمد خالد، جو تھانہ وحدت کالونی میں درج مقدمہ نمبر 381/459 میں گرفتار تھا، کو پولیس برآمدگی کے لئے لیکر جا رہی تھی، جب پولیس پارٹی کاچھا منڈی کے قریب پہنچی تو ملزم کے ساتھیوں نے اسے چھڑوانے کی غرض سے پولیس پر سیدھی فائرنگ کر دی۔
پولیس ذرائع کے مطابق فائرنگ کے تبادلے میں محمد خالد اپنے ہی ساتھیوں کی گولیوں کا نشانہ بن کر موقع پر ہلاک ہو گیا، واقعہ کے بعد پولیس نے فوری طور پر علاقے کو گھیرے میں لے لیا، تاہم حملہ آور فرار ہونے میں کامیاب ہو گئے۔
پولیس کے مطابق ہلاک ہونے والے ملزم کی لاش کو ضروری قانونی کارروائی کے بعد جناح ہسپتال منتقل کر دیا گیا ہے، جبکہ حملہ آوروں کی گرفتاری کے لئے سرچ آپریشن شروع کر دیا گیا ہے۔
